E potret aki ta sirbi como un prueba bibo cu den politica tur cos ta posibel y cu tempo ta cura tur herida! Ken por a pensa un dia, cu e tresnan aki lo ta para bandi otro y trahando hunto. Tanto odio entre nan tres, awor a transforma den un union pa traha hunto pa nos pais. Cu si e “amistad” aki ta real, mester duna tempo, tempo. Ta tempo so lo por contesta cu si e trahamento hunto aki, entre otro cu Evelyn Wever y Marisol Lopez den e mesun Gabinete, ta duradero.
Por corda cu e salida di Marisol Lopez y Mervin Wyatt-Ras for di MEP a bay cu bastante turbulencia, intriga, menasa y humiyacion. Por corda con e mesun Evelyn Wever a cambia nan slot di porta di Fractiekamer den Parlamento pa no duna e dos Parlamentarionan acceso. Tur esey despues cu nan a vota hunto cu Fraccion doi AVP na aña 2010 pa camboa e areglo di pensioen pa politiconan. Di eynan Tromp a bira independiente y despues a integra den AVP, pa despues haci e mesun tipo di “zet” asina y a bandona partido pa bay cu POR. Tur esaki sin lubida cu e prome partido cu ela a acerca pa drenta politica na 1997 tabata AVP pero como cu e no a haya e number desea pa subi lista, e tempo ey, el a dicidi di bay cu MEP.
E relacion entre Otmar Oduber y Evelyn Wever ta un paso mas leu, compara cu Marisol y Evelyn. Den e relacion entre Oduber-Wever, a bay asina leu cu a acusa otro di tur sorto di cos. Incluyendo cu Evelyn Wever a gana un caso den Corte contra Diario, pa un publicacion cu e mesun Otmar Oduber a laga haci, pa cual e corant mester a paga un suma cuantioso na dje. E tempo ey a acusa Wever y su casa di ta maniobra cu fondonan grandi cu companianan secreto. No por a prueba y como tal mester a paga daño y perhuicio.
Na otro banda, Evelyn Wever a keha Otmar Oduber na Ministerio Publico pa corupcion den ATA y mas. E acusacion a bay compaña pa hopi prueba, den cual ta mustra claramente cu e compania di e strooman Ralph Maduro tabatin vinculo directo cu Oduber. E ultimo, siendo Minister, tabata percura pa trabou y fondonan grandi pasa pa e compania di Maduro, den varios si no ta tur e companianan estatal resortando bou di su Ministerio.
Otmar Oduber a acusa Evelyn Wever, cu via su tata a enrikese nan mes durante e gobernacion di MEP entre 2001 pa 2009. No solamente via e bufete di abogadonan Croes, Wever & Tjong e tempo ey, sino tambe via su tanta cu tabata y ainda ta huur edificio cu Gobierno. Hilaridad ta cu te awe e mesun tanta ta huur edificio cu Gobierno, kisas hasta mas, pero cu cambio di asignatura politico, awor si ta posibel. Mescos cu tata di Croes, awendia ta traha mas ainda, ta representa MAYORIA di e companianan estatal cu ta resorta bou di Prome Minister, ta envolvi den Refineria di Aruba NV, un berdadero conflicto di interes. Pero, como cu tin cambio di gobernacion, awor ta posibel.
Ta pesey Watty Vos a bisa Tico Croes hopi aña pasa, pa “speak your words nice and sweet, in case you have to swallow them”.
