Politica Aruba na Gobierno: NO acepta condicionnan di Hulanda!

3330

Partidonan politico di Aruba a yega na un consenso riba e punto di relacion den Reino y fiansa for di Gobierno di Hulanda. Tur di nan a bisa Prome Minister mr. Evelyn Wever pa no bay di acuerdo y no firma e condicionnan cu Hulanda kier impone riba nos, mara na un fiansa di tempo largo. Tur ta sinti cu e forma con Hulanda kier implementa e medidanan y hinca Aruba den un situacion di hasta prome cu Status Aparte ta totalmente incondicional. Ta conseha Aruba pa mescos cu Corsou y Sint Maarten, pa nos tambe bisa Hulanda keda cu Bo saco di placa y cu henter Bo lista di condicionnan!

E partidonan politico AVP, MEP, POR, RED, Raiz y UPP a sinta hunto awe den e sala bieu di Conseho di Minister hunto cu Minister Presidente mr. Evelyn Wever-Croes pa ricibi un presentacion di Departamento di Finansa y Departamento di Asuntonan Huridico di Gobierno relaciona cu e prestamo y condicionnan cu Gobierno di Hulanda ta imponiendo riba nos, mara na e siguiente tranche di fiansa pa Aruba. Si nos isla no bay di acuerdo cu e condicionnan, Hulanda lo no los e fondonan cu Aruba mester pa por cubri FASE, Subsidio di Salario ni otro gastonan di Gobierno pa e luna aki.

Prome reaccion di lidernan politico riba Cumbre Nacional

Prome reaccion di lidernan politico riba Cumbre Nacional

Posted by 24ora on Wednesday, July 8, 2020

E presentacion duna awe pa e departamentonan di Gobierno ta e mesun cu a presenta ayera tardi den Parlamento di Aruba y ta e mesun cu a presenta awe mainta na gremio comercial y sindical. Ey por mira cu dor di e consecuencianan di Covid-19 y ceramento di nos frontera, cu for di un surplus programa pa e aña aki, awo nos tin un deficit di 1.4 biyon florin! Gobierno ta pronostica cu si no bin inyeccion financiero di Hulanda, cu pa luna di augustus caba nos isla lo por alcansa 500 miyon florin den cora!

Participantenan na e cumbre: Hendrik Tevreden, Presidente di MEP; Booshi Wever, Lider di UPP; Robert Candelaria di partido AVP; Minister Presidente mr. Evelyn Wever-Croes; Andin Bikker, lider di POR; Ricardo Croes, lider di RED y Ursell Arends, lider di RAIZ.

Ta cu e cifranan aki riba mesa y e realidad financiero/economico bou brasa, Gobierno a dicidi di sali presenta e scenario na Parlamento, na gremio comercial, sindical y politico. E opinionnan sinembargo ta mixto, pasobra sindicatonan ta pensa cu no mester acepta mientras cu comercio ta sinti cu nos no tin otro opcion, sino Aruba lo “crash” economicamente. Tambe comercio ta compronde e posicion di Hulanda parcialmente pasobra e mesun partidonan politico a goberna e pais aki e ultimo decadanan di tal forma cu nos maneho financiero tabata desastroso, cu a hinca nos den e posicion cu nos ta awe.

Lider di RAIZ, Ursell Arends den entrevista cu nos Director, Mark-Benson Denz. Ursell Arends a funda Partido RAIZ dia 9 di Juni 2017 y a bira Lider desde su fundacion. A participa un solo biaha den eleccion, na September 2017 y a logra 2107 voto. Ideologia di Partido RAIZ ta Social democrata, progresivo y liberal.

Lider di Partido RAIZ, Ursell Arends, a bisa di ta masha contento cu partidonan politico a uni riba e tema specifico aki. Arends a corda cu semper den pasado politiconan tabata dividi, locual sin duda a duna Hulanda un “edge” riba nos, pero awor esaki no ta asina mas. Politiconan ta consciente cu nos tur ta benta na suela, economia ta stagna, pero cu awor hunto mester construi nos pais bek. E mensahe di RAIS na Minister Presidente tabata pa no firma diabierna awor, pero pa nos por studia un poco mas, pa asina nos por bin cu un proposicion nobo.

Parlamentario Robert Candelaria den entrevista cu nos Director, Mark-Benson Denz pafo di edificio di Conseho di Minister awe tardi. J.H.A. “Henny” Eman a funda “Arubaanse Volks Partij” (AVP) na aña 1942. Lidernan desde fundacion tabata J.H.A. “Henny” Eman (welo), Cornelis A. “Shon A” Eman, Dominico Guzman Croes, Rudy Frank, Chibi Croes, J.H.A. “Henny” Eman, Robertico “Tico” Croes y M.G. “Mike” Eman. Na tur a participa den 28 eleccion. Record maximo di voto: 33,103 (2013) y Record minimo di voto: 1209 (1977). Den ultimo eleccion na September 2017 e partido a logra 23,376, manteniendo su mes como e partido mas grandi di Aruba, pero bayendo atras di 13 pa 9 asiento. Ideologia di AVP ta Regional, Cristian Democrata & Conservatismo.

Robert Candelaria, den representacion di Lider di Partido AVP, a duna di conoce cu tempo ta coriendo contra nos. Pesey ta importante pa comunidad ta bon informa, teniendo cuenta por ehempel cuanto aña a transcuri pa nos pueblo a pidi pa Status Aparte. Aki den 4 dia Gobierno di Hulanda kier nos tuma decision pa bay te hasta prome cu Status Aparte. AVP ta boga pa bay mesa cu Hulanda y habri dialogo pa purba yega na decisionnan nobo.

Parlamentario Hendrik Tevreden a participa awe den su calidad di Presidente di Partido MEP. Gilberto F. “Betico” Croes a funda Movimiento Electoral di Pueblo (M.E.P) dia 9 di Februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyne Wever-Croes. A participa 17 biaha den eleccion. Record maximo di voto: 25,172 (2001) y Record minimo di voto: 8095 (1973). Den e ultimo eleccion na September 2017, Partido MEP a logra 22,061, bon pa 9 asiento den Parlamento. Nan ideologia ta Social Democrata.

Hendrik Tevreden, siendo Presidente di Partido MEP a bisa nos awe cu e decision aki ta doloroso. E ta lamenta cu net awo cu nos lo tabatin 46 miyon di surplus e aña aki, pero dor di un pandemia, awor ta haya nos den e situacion alarmante aki. Aruba a hay’e ta cera frontera, locual a causa cu e consecuencia economico a resulta devastador. Pero net awo cu nos a pensa cu Hulanda lo saca un man pa nos, cu net awo Gobierno di Hulanda a opta pa pone nos bou supervision y corta den nos economia di tal forma. Tur esaki net awo cu nos tin un deficit di 14 biyon florin, cu awor Hulanda ta opta pa impone un RFT riba nos. “Esaki ta inhumano. NO ta algo cu nos a spera. Pesey nos ta completamente contra”, asina Hendrik Tevreden di MEP a bisa awe.

Drs. Candelario “Booshi” Wever pafo di edificio di Conseho di Minister despues di a reuni cu Minister Presidente, mr. Evelyn Wever-Croes, reuniendo riba e posicion di Hulanda pa cu fiansa pa Aruba. Drs. Candelario “Booshi” Wever & Raymond Hernandez a funda Union Patriotico Progresista (U.P.P) na aña 2013. Lider desde su fundacion ta Drs. Candelario “Booshi” Wever y a participa 2 biaha den eleccion. Record maximo di voto: 805 (2013) y Record minimo di voto: 656 na 2017 (lista combina cu PPA). Ideologia di UPP ta Social Democrata.

Candelario “Booshi” Wever, lider di UPP a sali bisa cu “Nos ta para tras di Gobierno, cu si nan bisa cu no ta firma diabierna awo, nos ta para 100% nan tras pasobra locual a wordo presenta dor di Hulanda ta simplemente inaceptabel”. Un di e puntonan cu Wever ta considera incondicional e hecho cu Hulanda ta bisa Minister Presidente cu e no mag comparti e documento cu Parlamento. Pa loke ta e RFT, e partido UPP ta contra. Tempo a bin cu CFT tabatin sentimiento mixto pero awo cu RFT a duna un sentimiento di impotencia, locual Booshi Wever ta sinti cu mester bay afo cu ne. “Nos no por sigui goberna e pais aki manera nos tabata haciendo pa añanan caba. Pesey nos a presenta un position paper. Ta sinti si cu Gobierno di Hulanda no ta confia ni Gobierno di Aruba, ni di Corsou y tampoco di Sint Maarten. Pesey mi ta sugeri pa un zakenkabinet awo, pa nos bay den un time-out, pa despues nos yama eleccion pa recobra confiansa di Hulanda y di pueblo di Aruba, cu tambe a perde confiansa den politiconan.