Sindicato di Polis Aruba (SPA) a manda un mensahe cla y raspa pa Gobierno, cu nan ta rabia y kier un contesta concreto di Gobierno con ta bay paga indexering 2018.
Segun presidente di e sindicato Jose Dirksz, diahuebs a haya un peticion di parti di e Minister di Husticia, kende a pidi pa nan t’ey presente durante reunion. Na comienso e sindicato a bay di acuerdo, pero na momento cu a habri e reunion, e miembronan a opta pa no tin presencia di e Minister di Husticia.
E miembronan a reacciona di biaha bisando cu si for di april ta sinta na mesa, dicon te awo cu a cuminsa cu accion, diripiente kier sinta na mesa.
E accion a sigui, cual ta uno di minimaal bezetting di tur e departamentonan. Esey ta e prome paso, segun Dirksz, pa wak ki atencion ta bay haya di Gobierno pa wak con e indexering di 2018 ta bay wordo paga. Tambe a haya sorpresa di e otro sindicatonan, esta SIMAR, SEPPA y SADA, cu a presenta pa mustra nan apoyo na SPA.
Presidente di e sindicatonan aki a presenta pa sosten moral y a hiba palabra. Un di e sindicatonan a bisa cu no ta prome biaha cu nan ta den e lucha pa indexering di e ambtenaarnan. E polisnan tur a aprecia esey. Esaki ta comienso di nan derechonan y no ta bay drumi riba dje. Ta bay keda te ora cu haya un contesta concreto.
Malcontento
Diahuebs tambe tabata tin mal contento di parti di recherche. Despues di e walkout, a reuni cu Minister di Husticia, leiding y hefe di Recherche Oranjestad na Macuarima mes. A bin cierto acuerdonan cu tin cu tuma luga den e edificio di Wayaca. E minister a priminti un termino hopi cortico cu esey lo tuma luga pa asina aloca e recherchenan na e edificio di Wayaca.
E siguiente pasonan
Segun Dirksz, semper nan kier sinta na mesa y yega na un solucion. Pero si Gobierno no kier bin cu ningun solucion concreto con e ta bay ta paga, mester bay bek cerca e miembronan, wak kico nan kier pa e sindicato haci. Dirksz a enfatisa cu tur sindicato ta traha den nomber di su miembronan. E miembronan ta duna mandato kico e sindicato tin cu bay haci.