Como cu recientemente, Ministerio Publico a dicidi di muda e mas di 2 ton di cocaina cu a decomisa for di e tugboat cu a sali for di Cartagena, Colombia pa Aruba, for di Marinierskazerne pa Warda di Polis na Santa Cruz, awenochi Polisnan a dicidi di bandona pia di trabou. Nan ta teme cu tanto droga ta malo pa nan salud y tambe pa nan propio siguridad. A manda yama nan sindicato pa presenta. Mientrastanto tur Polis a bandona e Warda, pa cual Polisnan di otro districto mester a yega pa aumenta siguridad na y rond di e Warda di Polis.
E accion aki a hala hopi atencion den comunidad. Di otro banda, Polisnan a splica nos cu e hinca henter e cargamento multimiyonario di droga den un camber. Nan ta teme cu e concentracion di acetona lo afecta nan salud. Di otro banda tin otro Polisnan ta teme cu gruponan lo por ataca e Warda di Polis pa horta e mas di 80 bultonan, cu a pisa mas di 2.200 kilo di cocaina.
Di acuerdo cu e Oficina di Nacionnan Uni pa droga y criminalidad, un kilo di cocaina na Hulanda ta costa mas o menos 50 mil Euro mientras cu na Merca e ta rond di 30 mil Dollar. Pues por papia aki di un cargamento di 110 miyon Euro warda eyden.
A nota cu tin Polisnan fuertemente arma riba dak di Warda di Polis di Santa Cruz cu luz special pa cuida e edificio. E Polisnan mes ta cuestiona dicon a muda e droga for di un centro special manera Marinierskazerne pa un Warda di Polis cu no tin tanto siguridad 24 ora pa dia manera un base militar.
