E ekipo di Polisnan riba brommer a tene un control diasabra anochi na diferente sitio strategico, manera na entre otro San Nicolas dilanti Don Bosco, South Beach, riba L.G. Smith Boulevard, riba caminda di Kibaima y riba e caminda di Tanki Flip. E tipo di controlnan aki ta tanto preventivo como represivo, pasobra automobilistanan mira control, automaticamente ta reduci velocidad y ta bira mas consciente den trafico.
Na final di e control, Cuerpo Policial Aruba a raporta cu a detene un total di 5 chauffeur pa entre otro, stuur bou influencia di alcohol y stuur sin rijbewijs.
Na tur a para mas di 130 auto pa control y a parti no menos di 45 multa. E motibo pa duna multa ta varia masha.
Controlnan di e Unidad Motorisa, specialmente riba stuurmento bou influencia di alcohol, comportacion den trafico y stuur sin rijbewijs, lo sigui durante tur e simannan cu a keda di aña 2018.
