Durante weekend e ekipo di polisnan riba brommer a haci su debido controlnan y cu a produci bon resultado. Asina diabierna anochi a parti 62 multa pa maneha cu exceso di velocidad riba Avenida E.J. (Watty) Vos, Green Corridor y Avenida Nelson O. Oduber. Entre nan a topa cu un taxista manehando cu velocidad di 150 kilometer pa ora. Cu permiso di fiscal a confisca e taxi.
Na altura di Chaos Cafe a topa cu un scooter sin documento y cu tambe a wordo confisca y hiba cu takelwagen. A controla Samenscholling banda di Linear park, Eagle Beach, Arashi y Bushiri.
Diasabra e mesun ekipo special aki di polisnan entusiasma riba motorcycle a logra stop caredanan ilegal di auto y di brommer. A topa cu un brommer prepara pa dragrace y cla pa pusta, pero no tabatin ningun documento, pa cual a kit’e di e motociclista y a hib’e ward’i polis pendiente pa e doño por paga tur e impuestonan, seguro y keur pa por sac’e bek.
Riba diasabra anochi e ekipo di polisnan motorisa a duna 40 multa pa entre otro surpasa velocidad maximo, core cu celular den man y a detene un chauffeur pa stuur auto sin rijbewijs.