Polisnan no kier tende: Indexering mester bin!

Sindicato di Polis Aruba (SPA) a tene un reunion cu su miembronan unda cu a trata diferente tema di gran importancia pa e Polisnan, pero tambe pa Aruba. Un di nan tabata e asunto di indexering.
Pero prome cu tur cos a trata e asunto cu Gobierno kier pone militarnan vigila costa di Aruba. En principio, segun e presidente di SPA Joselito Dirksz, e miembronan no tin problema pa esaki tuma luga. Pero e mester sosode bou supervision di Korspchef pa mantene un bon bista di loke ta pasando na Aruba.

A atende tambe algun tema relaciona cu hubileo di miembronan y con esaki ta wordo celebra. Pero mas importante tabata e tema di indexering, cual a wordo atendi den e reunion di tur sindicatonan dialuna ultimo. Eyden a bini dilanti cu e posicion di Gobierno ta cu no tin placa pa indexering. SPA a discuti e tema aki awe cu su miembronan, kendenan no tabata di acuerdo cu e posicion aki tuma door di Gobierno di Prome Minister Evelyn Wever Croes. Tur Gobiero, segun Dirksz, a bisa cu no tin placa pa indexering, pero na final a duna algo toch. “Coleganan no ta bay acepta contesta di Gobierno cu no tin indexering.”

Diabierna mainta Presidente di tur e sindicatonan, despues di a consulta cu nan miembrecia, ta bay topa pa discuti e posicion di e miembronan y cual ta e siguiente paso(nan) cu ta bay tuma.

 

Tin mas malcontento bou miembronan di KPA, ya cu tin diferente vacatura habri pero ningun solicitud ta wordo saca. Esaki ta stroba nan di sigui crece den carera. Pa e motibo aki nan a pidi un claridad di Mando Policial riba e tema. Pa colmo no tin un nombramento fiho ainda di Hefe Policial. Un cuerpo cu no tin un hefe nombra di un forma definitivo ta haci e organisacion un tiki instabiel. Ta hopi importante pa Minister di Husticia tene cuenta cu nombramento di un Hefe Policial. A resulta cu den e reunion di diahuebs mainta tabatin un Polis cu a solicita pa e puesto di Hefe Policial, pero e no a ni wordo yama pa un combersacion. SPA ta haya cu esaki ta un falta di respet pa esun cu a solicita.

P’esey nan kier un clarificacion. Un otro aspecto interno ta e asunto cu Polisnan riba 55 aña cu ta traha “nachtdiesnt”. SPA ta haya cu esaki ta algo inhumano. “No ta husto cu un colega di 60 aña mester bay core tras di un ladron,” e Presidente di SPA a splica. Mester yega na un sistema social cu e Polisnan, despues di 55 aña, mester cuminsa “bouw af” e tipo di trabounan aki.

Asina tambe nan a caba di haya e noticia cu un colega na Warda di Polis na Playa a bira basta malo. Control a wordo haci, pero nan no a haya copia di ningun rapport di Salubridad Publico. Nan a haci peticion pa e control tuma luga na tur warda, pero esey no a sosode te cu awe. Tambe e asunto di vest pa protege e Polis cu ta hopi necesario, mas ainda awo cu tin e situacion di hendenan cu ta drenta ilegal cu arma y otro tipo di artefactonan.
SPA ta bay sigui pusha pa haya tur e aclaracionnan for di Gobierno y Minister di Husticia.