Ta parce cu Cuerpo Policial Aruba tin masha mala suerte cu buscamento di edificio nobo pa por acomoda nan Warda di Polis pa e districto principal, Oranjestad. Pa hopi aña caba nan kier sali for di centro di ciudad, pa por mobilisa mas lihe den caso di un emergencia. Pero nan wowo a pasa riba ex edificio di John F. Kennedy School, despues riba ex edificio di DOW den Paardenbaaistraat, despues riba Brown Building na Wayaca y awor riba e ex edificio di Codemsa na Cumana. Te ainda, cada biaha atrobe, e negosacionnan ta tranca of no ta continua. Di otro banda e Polisnan ta keda den e mesun edificio, cu tur e problemanan cu nan tabatin tur e añanan caba y cu ainda no a soluciona.
Pa simannan largo a negocia cu Alejandro Muyale, cu tabata den proceso pa cumpra Brown Building na Wayaca y lo kier a huur e mesora cu Gobierno pa acomoda Cuerpo Policial Aruba den dje. Lo a haci un inversion adicional pa construi un compleho di celnan pa por detene sospechosonan pa 10 dia largo. For di augustus 2019 el a firma un acuerdo cu Browninvest NV pero, no a keda cla cu nan pa finalisa e compra y e pago. Tur esaki mientras cu Cuerpo Policial Aruba y e sindicato di polis (SPA) a acorda cu e edificio ey lo ta bon pa acomoda e departamentonan cu ta traha na Ward’i Playa. A tene cuenta cu su posicion strategico eynan, riba Watty Vos Boulevard y Green Corridor y dilanti e oficina di Recherche (ex-KPMG).
Tocante Brown Building
E edificio conoci como “Brown Building” ta pertenece na Browninvest NV y tin derecho riba e tereno erfpacht te na aña 2051. A construi e edificio na aña 1992 y e tin tres piso, compaña cu un tereno di como 1800 meter cuadra rond na parkeerplaats y mata, situa na Wayaca # 31-A. Cada piso riba su mes ta representa como 504 m2 na espacio pa oficina so. Banda di esey e tin trapi, galeria y otro espacionan adicional mas. E doño tabata pidi como 7 miyon florin pa e edificio.
Mas alternativa pa Polis
Pero como cu e huurdo no por keda cla cu compra di e edificio, pa por yega na un acuerdo cu DIP, awor a presenta un otro alternativa riba mesa, esta e ex edificio di Codemsa. Pero eynan e retonan ta un poco mas grandi. E edificio riba su mes, mescos Brown Building, tambe ta bon situa net banda di un rotonde cu ta conecta Watty Vos Boulevard, caminda pa Santa Cruz, Oranjestad y mas. E edificio ta grandi, den cual por inclui varios otro departamento di Polis aden of kisas hasta otronan cu ta resorta bou di Ministerio di Husticia. E lo por traduci den cortamento di huur den otro edificionan. Pero, aki atrobe Gobierno ta na mesa cu un intermediario y no cu doño di e edificio. Den cierto forma, Gobierno lo pega atrobe, mescos cu na Brown Buidling, cu DIP no ta firma contract cu ningun intermediario sino cu doño di e edificio mes.
Tocante e ex edificio di Codemsa
A construi e edificio na aña 1996 riba un total di 8 diferente tereno combina y pega na otro, conoci bou di e adres Cumana # 69. Na tur e tin un area di 21.255 m3. Na tur tin 6.908 m2 di espacio na oficina den e edificio grandi aki, cu inicialmente a traha pa negoshi y warehouse. E ta parti den e edificio principal di 5960 m2 sigui pa un edificio adicional den cura di 948 m2 y un espacio pa “storage di 456 m2. E doño kier bende pa Afl. 8.934.660,=. por corda cu e comerciante Johnny Chemaly tabata envolvi cu Codemsa na su inicio y despues a pasa pa Edwin Thiel. Retonan a presenta y algun tempo pasa e compania a bay bancarota
Wardanan di Polis sa ta PPP
No ta nada nobo, esta cu un compania ta financia, construi y mantene edificio como Warda di Polis. Aki na Aruba, e Ward’i Polis di Noord y esun di Santa Cruz, ambos ta via un fiansa den un construccion cu e compania ALBO. Ta for di aña 2004, tempo cu Rudy Croes tabata Minister di Husticia a regla e “deal” ey. Y Polis te awe ta contento cu ne pasobra e compania ta encarga cu tur “groot onderhoud” y Polis mes ta haci e trabounan di reparacion facil y chikito. Awor aki e unico Ward’i Polis di Gobierno ta esun na San Nicolas, pasobra esun cu ta uzando den Wilhelminastraat ta di FCCA.
Lo por tin luz na horizonte
Mientras cu ainda ta keda pega entre aspectonan legal di contract entre Gobierno y huurdo di edificio, ta parce cu por tin luz na horizonte. Tin indicacion cu AIB-Bank mes tambe lo ta interesa den cumpra Brown Building mientras cu Browninvest mes tambe awor lo por ta interesa pa cera un acuerdo directamente cu Gobierno, enbez cu mester pasa via un intermediario. Nan mes, siendo doño di e edificio, lo por prepara e edificio manera Gobierno ta rekeri y yega na un acuerdo di huur pa un tempo defini. Esaki ta necesario pasobra, manera Gobierno di Hulanda a bisa adelanta, no por spaar den husticia y mantencion di ordo publico, pues edificio pa Polis lo por ta halto riba lista di prioridadnan.
