E problema y crisis cu Coronavirus a causa un desempleo grandi. Ademas di esey el a causa tambe un problema di entrada pa miles di esnan riba e mercado laboral. Empresanan a manda miles di hende cas. Sea sin pago, vakantie obligatorio of tambe cu un parti di nan salario. E placa cu tin awor aki hendenan ta warda esaki pa nan por come. E placa of entrada cu tin no ta yega pa paga tur cos. Hopi hende na Aruba ta huur un apartamento of un cas. Pa falta di trabou of entrada financiero, e ta causa cu nan no por paga huur di luna. Hopi doño di cas of apartamento ta compronde. Otro banda tin cu no ta compronde. Minister Glenbert Croes mes a bisa algun dia pasa pa tene cuenta cu e huur pa no saca hende riba caya. Asina mes su expresion no ta nifica un instruccion. E ta mas bien mencione. Di otro banda tin doñonan di apartamento cu ta conta cu e placa di huur sea pa paga debe of sobrevivi. Ta algo cu nan a traha hopi aña riba dje pa nan tin un extra entrada. Awor cu e situacion actual a tuma nota cu tin varios hende cu no ta pagando huur. Kizas nan no por paga tampoco pasobra a keda sin trabou. Kico esaki a causa? Esaki a causa cu varios doño di apartamento kier saca esun bibando den e apartamento of cas. Pasobra no a cumpli cu e pago fin di luna, a cuminsa na kita coriente etc. Pa e motibonan aki Polisnan ta atendiendo diariamente un of mas asistencia pa intermedia.
Ta momentonan dificil. Awor aki mester para keto y mira si ora bo saca e persona di e apartamento, si otro lo drenta. Awor aki ningun hende tin e placa y luho pa huur apartamento of cas. Ta momento pa djis papia cu esun cu ta huur y purba yega na areglo. Para riba bo prijs completo di huur no ta bay yuda na nada. Kita coriente pa purba core cu e persona den apartamento tampoco ta solucion. Ta momentonan di dialoga y yega na solucion hunto pa tur situaciuon cu presenta. Polisnan naturalmente ta intermedia y trata na yega na un solucion pa tur partido. Esaki ta dje un di e miles di problema cu awe Aruba ta pasando aden mescos cu cualkier otro parti di mundo. Cu hasta banconan a absorba lening di clientenan pa tres luna. Kiermen awor aki mester ta flexible cu hopi situacion pa hunto nos sali for di e crisis cu mundo ta pasando aden.
