Polis y hobennan di Bushiri a bataya den futbol

E hobennan di Bushiri a bin cu un iniciativa pa reta Cuerpo Policial pa loke ta un zaalvoetbal. Segun Edwin Tromp, Director di FCCA, una bes cu a bin cu e idea, a tum’e cu dos man hunto cu Cuerpo Policial Aruba (KPA) pa organisa e evento aki.

No ta Cuerpo Policial of FCCA so por bin cu e idea, pero nan tambe por bin cun’e. Durante di e encuentro aki, tabata tin weganan cu a bay entre Bushiri y Cuerpo Policial.Tambe a haya e muchanan di Madiki Kavel y Cuerpo Policial. E conocido cantante Jeon tambe a bin cu un team pa enfrenta un team mixto di Cuerpo Policial.

Polis y hobennan di Bushiri a bataya cu otro den futbol. FCCA contento cu e iniciativa y exito di e evento

Polis y hobennan di Bushiri a bataya cu otro den futbol. FCCA contento cu e iniciativa y exito di e evento

Posted by 24ora on Thursday, July 9, 2020

Deber di FCCA tambe ta pa participa un biaha mas den e barionan. Asina ey ta guia muchanan hoben, aunke e situacion ta tiki dificil. Kisas por tin un lider entre e muchanan aki, segun Tromp. E idea ta pa no keda eynan so. Tin mas actividad cu FCCA ta haci pa e muchanan den e diferente barionan. No solamente mucha, pero tambe hendenan grandi, manera nochinan di bingo, tambe tour den bus. Kier sigui haci esaki pero den e otro barionan manera Sero Patrishi, Cura Cabay Zuid. Tin luganan na Mabon, na Jaburibari, tin na Village. Esey kier haci. Obviamente cu un idea di e muchanan mes, ta haci cu e challenge ta bira leuk.

Di parti di Cuerpo Policial, Alvin Molina a comenta cu e bunita di e evento aki ta, cu ta un idea cu a bin di e muchanan di Bushiri mes. Nan a reta e agentenan Vos y Chirino y a bisa cu nan lo bari mop riba veld di futbol. Na final, el a resulta hopi grandi, un iniciativa di e muchanan mes, hunto cu Cuerpo Policial y FCCA. Nan a uni forsa, hunto cu e bario di Madiki tambe y nos artista local, Jeon y Isabich. E ta un comienso di algo hopi bunita entre polis y e habitantenan di e bario en cuestion, unda cu por mira hopi bon cu nan por a biba bon cu otro. Nan por coopera cu otro, nan por pasa bon cu otro y ta spera cu den futuro nan por yuda otro tambe.

Un bon relacion

Si por a mira rond mundo, kico ta pasando cu e nomber di polis, lastimamente segun Molina y hustifica tambe, polis tin hopi mal nomber. Como polis mester realisa cu mester di apoyo di pueblo, mester tin un bon relacion cu pueblo pa nan por haci nan trabao bon y nan trabao ta sirbi pueblo.

Mas iniciativa

Segun Molina, e por a scucha for di e director di FCCA, ta desea pa esaki sosode den tur bario rond di Aruba. E continuidad aki ta importante. E iniciativa na Bushiri ta bunita berdad, pero e no mester ta e unico biaha cu e ta sosode.

Asistencianan den e bario

Apesar cu varios biaha polis sa bin den e bario pa asistencia, toch ta un bista hopi agradabel cu e agentenan por a bin den nan uniform pa e iniciativa aki. Segun Molina, e apoyo for di Cuerpo Policial ta enorme. Robert Vos y Chirino, a pone tur e coleganan di tur districto hunto y hasta di Scol di Polis, pa por aporta den e evento aki y e ta bunita. Por a sinti e energia cu tabata hopi positivo.

Segun Molina, FCCA a sponsor tur loke ta cuminda y bebida. E ta algo hopi bon. Nan tambe a mira e importancia di ta uni cu e habitantenan di e barionan.

Un iniciativa tremendo

Segun Robert Vos, di Cuerpo Policial, e iniciativa aki a cuminsa ora cu un di e muchanan di bario a reta polis, pa un torneo di futbol. Nan kiermen cu Bushiri ta miho cu Cuerpo Policial y nan a tuma e reto.

Hunto cu FCCA a organisa tur e detayenan cu a tuma luga diahuebs anochi. Vos ta hopi contento cu por a bin pa e evento y no pa un problema den bario, conociendo cu e bario ta basta bishita pa polis.

Den e caso aki nan a join e habitantenan y cera on bond cu nan. Esaki sigur ta un evento cu por ta un ehempel cu por ta implementa den e otro barionan cu tin e facilidadnan cu por organisa diferente evento y deporte. Esey ta e intension, segun Vos. Polis ta amigo di un y tur y ta purba di mantene na e manera ey.

Aprobacion di Jeon

Segun nos artista local Jeon, esaki tabata un evento hopi bon. Nan mes a perde 3-1 contra e ekipo di bario. Di un otro banda, Jeon ta hay’e hopi great loke cu Cuerpo Policial a haci cu e bario di Bushiri. Tabata un tremendo gesto, algo cu mester sigui organisa. E ta contento cu a invit’e tambe pa e evento en cuestion.

Jeon sigur ta dispuesto pa sigui aporta na nos comunidad. Cualkier biaha cu invit’e e lo ta mas cu dispuesto. No solamente el a bin canta, sino el a participa tambe. Anytime pa e barionan, el a bisa finalmente.