Kuerpo Polisial ta konsiente di e kantidat di atrakonan ku últimamente ta asotando nos komunidat i ku ta sòru pa un sentido di inseguridat den nos komunidat. Tim di atrako ta trahando duru riba e diferente kasonan aki i banda di detenshonnan ku ya kaba a keda realisá, tin pista tambe riba algun sospechoso ku ainda mester keda detené. Último simannan unidatnan polisial durante di kontrol a konfiská diferente armanan di kandela, ku posiblemente por a keda usá den kasonan di atrako. No opstante ku atenshon pa kriminalidat ta un responsabilidat di henter komunidat, polis ta keda e órgano enkargá ku mantenshon di òrdu públiko i seguridat riba nos isla. Den kuadro di esei, polis ta hasiendo ehersisionan èkstra i ta tumando medidanan adishonal pa di un banda aktua di forma preventivo i na mes momentu reakshoná inmediatamente riba atrakonan, pa asina ei oumentá e detenshonnan al instante.
Sin ke bai den kontenido di strategianan ku polis lo apliká, komunidat lo bai tuma nota di mas presensia polisial visibel na sitionan stratégiko den dianan ku ta bai bini. Lo bai oumentá tambe e kantidat di unidatnan riba kaya di dia i anochi i te asta lo bai enbolbí otro partnernan ku lo yuda kuerpo polisial ku e vigilansia preventivo. Tambe polis lo bai tene hopi mas kontrol riba vehíkulonan i personanan sospechoso riba kaya i na sitionan unda ta konosí ku aktonan ilegal ta tuma lugá. Den tur e esfuersonan aki, Kuerpo Polisial ta sigui konta riba komunidat su koperashon, dor di duna informashon i mèldu situashonnan dudoso mesora. Nos tin mester di bo, pa yuda nos yuda bo.
