Polis ta gara hoben ta huma marihuana den Paseo Herencia

Diahuebs, pa mas of menos 5’or y 10 di atardi, durante patruya na pia den paseo Herencia, na altura di TGI Friday, nan a sinti un holo di marihuana, pero polis no tabata sigur for di unda e holo tabata bin. A purba di sinti e holo bek, pero no por a hole nada mas. A sigui cana y na altura di Mimo’s Roll Icecream, polis a bolbe haya un holo penetrante di marihuana.

E area di tribuna ta uno familiar den Paseo Herencia

A base di esaki, polis a cuminsa busca e persona kende tabata humando e marihuana. Polis a nota cu rita e tribuna, na altura di e fonteinnan, nan a mira un hoben bisti cu un tshirt blauw cu jeans bisti, sinta riba un di e bankinan. El a mira cu e tabata tin algo, parecido na un sigaria, cu e tabata purba di sconde. Polis a acerca e hoben y a puntr’e kico e tin den su man. Polis a scucha cu e tabata bisa algo, pero incomprendibel. Riba esaki, polis a bolbe puntr’e kico e tabata tin den su mannan. A ordo e hoben pa habri su man, cual ordo el a sigui. Polis a mira cu e tabata tin un joint di marihuana. Esaki a wordo confisca. A pidi e hoben pa bay cu polis na un luga cu tabata tin menos publico presente y akinan a ristr’e riba tur cos. A pidi’e pa saca tur cos for di su saconan di carson. For di aki el a saca un sker, un lighter color oranje, dos carchi di cinema y un saco chikito cu marihuana den dje. Despues di esaki a detene e hoben y a hib’e na warda di Shaba, unda cu el a presenta dilanti di fiscal auxiliar.