Sindicato di Polisnan di Aruba, S.P.A. a expresa su malcontento pa e uzo di militarnan arma dor di un investigacion di Recherche Samenwerkings Team (RST) na un supermercado Chines. Loke pa e Polisnan ta remarcabel ta e hecho cu e militarnan tabata cana rond cu nan arma di candela! Sindicato SPA ta cuestiona si e militarnan tin e autoridad pa haci tal.
E proceso ta cu pa nan actua riba caminda publico, den poder di nan arma di candela, nan mester tin un apoderacion pa esaki. Ta asina ta birando cu poco poco militarnan ta haciendo trabou di Polis na Aruba? Nos ta bayendo den mes un direccion cu Venezuela? Kico lo pasa si un di e militarnan tira un cuidadano cu nan arma di candela, durante un di e investigacionnan asina, sin ta bevoegd pa carga arma? Ken ta bai para responsabel pa esey?
Cuerpo Policial di Aruba tin suficiente Polis y capabel pa asisti RST den un investigashon di cualkier magnitud, asina e sindicato a duna di conoce den un comunicado oficial.
E keho di Sindicato S.P.A. ta cu si mester pidi refuerso di Militarnan Hulandes, vooral pa yuda den investigacionnan hudicial, cu tin un procedura estricto mara na esaki y ta na momento cu Cuerpo Policial no tin e personal suficiente pa atende e caso, lo por haci e peticion aki. Den e caso specifico aki, no tabatin tal situacion, segun e dirigentenan sindical.
“Pa termina, trabou di Polis mester keda trabou di POLIS. Trabou di Militar mester keda trabou di MILITAR”, asina e relato di Sindicato SPA a termina.
