Polis ta controlando hopi riba uzo di signlight den trafico riba rotonde

Un asunto cu ta cunsumi hopi automobilista pero tambe Polisnan ta e falta di uza di señal den trafico.

E uzo di señal ta permiti un miho fluho di trafico, principalmente riba rotonde. Den esaki a combersa cu Alex Pieters, kende ta di e Motor Brigade y a bisa cu e problema aki ta grandi riba rotonde.

Pieters a splica cu no tin un ley specifico cu ta bisa con pa uza signlight riba rotonde. Ley ta bisa si cu cada biaha cu e chauffeur ta bay haci un cambio di dirección bo tin cu sortea na tempo y duna señal na otro usuarionan di caretera cu bo ta bay haci un cambio di direccion. Pa esaki bo mester pone bo signlight pa mustra cual ta e direccion cu bo ta bay tuma. “Pa ley pa cada cambio di direccion bo mester uza bo signlight y esaki ta conta riba rotonde tambe”

E discusion ta cu ley ta bisa adelanta bo tin cu duna e indicacion aki pero, segun Pieters ta splica, riba un rotonde esaki ta un poco fastioso pasobra e distancia ta hopi cortico pa pone e signlight y hopi hende ta subi rotonde cu velocidad halto. Si bo baha velocidad, bo tin suficiente tempo pa pone bo luz si bo ta bay scoge e prome salida.

Pieters a bisa cu ta importante pa mantene e regla y a constata cu tin biaha cu di 10 auto, solamente un ta uza signlight. E sorteamento y signlight ta permiti otro chauffeurnan haci un miho uzo di caretera y e trafico ta bira menos peligroso.

Pieters a bisa cu no ta importa na unda pero djis pone den cabes cu semper cu ta bay cambia di direccion, uza e signlight, di e forma aki ta evita accidente pero tambe un boet. “Unda cu bo ta cu bo yega, haci uzo di bo señal pa e otro trafico haya sa kico bo ta bay haci.”

E ta di acuerdo pa den forma continuo haci propaganda pa conscientisa e hendenan riba e reglanan cu ta importante den e tur e infrastructuranan nobo cu Aruba a conoce ultimo añanan y cu kisas e leynan cu mester di nan awor no a wordo uza hopi den pasado.