Polisnan e fin di siman aki ta prepara pa tene controlnan pisa riba “samenscholling” na lama. Esaki nan ta bisa den un declaracion manda pa prensa.
Cuerpo Policial ta informa comunidad di Aruba cu diadomingo lo tin controlnan cu lo tuma luga pa loke ta trata samenscholing banda di beachnan.
Mirando loke ta e situacion di COVID-19, a anuncia cu e controlnan lo bira mas severo. Ta bay tin un grupo di polis specialmente pa controla den e areanan di beach. Cuminsando for di ex Bushiri Hotel te cu Arashi. Pues tur caminda cu tin alglomeracion. No ta permiti grupo mas di 4 persona . Tampoco aglomeracion bao di palo di kwihinan riba e ruta. E controlnan ta cuminsa desde 10or di mainta . Esaki tambe ta conta pa gruponan cu ta sinta bao di e matanan di kwihi cu tin riba e ruta. Asina cu constata aglomeracion polis por bay over na duna cada persona un multa.
Cuerpo Policial ta haci un apelacion na cada ciudadano pa ta consciente di e situacion serio cu Aruba ta pasando aden en conexion cu e COVID-19. Ta pidi pa keda cas y sali solamente si ta necesario.
