Tabata net prome cu 10:00pm cu Aeropuerto a avisa Cuerpo Policial Aruba cu nan tin un situacion di emergencia, relaciona cu un pasahero cu a indica cu e tin un bom den su maleta. El a cay sinta den e “jet-bridge” y a pidi pa no laga ningun hende drenta eyden mas pa subi avion. E señora tabata bou influencia di alcohol y dificilmente por a rasona. Polis a detene pa neutralisa e situacion na Aeropuerto, aunke cu e trabou pisa ta sigui te den oranan lat di marduga.
Altocomisario di Polis, Andrew Hoo, durante un entrevista bibo cu nos dilanti terminal di Aeropuerto a indica cu a spacha varios patruya di Polis pa Aeropuerto pa preveni cu e situacion lo a bay for di man. Den pasado nan tin experiencia cu ora cosnan asina sosode, cu e otro pasaheronan ta altera y cuminsa lanta contra e trahadonan di Aeropuerto.
Algo pasa di 12:00am a “clear” e avion y e area den e terminal di Aeropuerto mes. Cuerpo Policial Aruba tin un ekipo anti explosivo cu a presenta mesora pa controla e area. Nan a haya sosten tambe di Koninklijke Marechaussee, cu a presenta cu ekiponan special pa detecta explosivo.
Ora cu a keda cla cu e avion, a bay over na controla maleta pa maleta, pa sigura cu ora e avion lanta vuelo, cu e ta liber di explosivo. E proceso ey a tuma luga na un area separa y leu for di e terminal mes di Aeropuerto. A nota Polisnan bisti cu un paña special pa atende cu explosivonan.
Di acuerdo cu Altocomisario Hoo, ta varios departamento di Gobierno a activa mesora na momento di un alarma asina, entre otro Brandweer, Ambulance y sin lubida Departamento di Calamidad. A activa e crisiscentrum den Aeropuerto den cual ta controla e situacion. Den e caso aki e crisis no tabata un aspecto tecnico sino mas bien penal, den cual Ministerio Publico tin un rol cardinal pa dicidi con lo persigui e pasahero aki cu a percura pa tene Aeropuerto cera pa por lo menos 4 ora!
