Polis: Nos tin dolor di cabes cu e mesun homber aki tur dia!

3258

Relaciona cu e articulo y e video presenta mas trempan, pa cu detencion di un homber canando burachi cu su cacho den Scopetstraat, a bin reaccion di Polis. Parce cu e mesun homber aki, ta dunando nan masha dolor di cabes, casi diariamente, den area di Ponton. Cada bes atrobe ta topa cune burachi y tur sushi y ta hib’e su cas. Awe atrobe a haci mesun cos, pues a transport’e pa su cas.

Segun version di Polis, e siman aki so tabatin no menos cu tres asistencia pa e mesun homber aki. Dos biaha a hib’e su cas y un biaha mester a hasta hib’e Hospital pa e ricibi tratamento medico, debi cu el a cay. Ta considera e homber un problema social den Ponton y su adres Ponton 22 ta “kom voor” masha hopi den e rapportnan diario di Cuerpo Policial Aruba.

Pa loke ta e kitamento di su garoti, Polis a bisa cu, di experiencia, cu den otro biahanan cu a detene e homber aki, cu e ta zwaai cu su garoti y por bira un arma contra e mesun defensornan di ley. Ta pa e motibo aki nan a rank’e for di su mannan y zwaai e leu. E hecho cu e homber a cay abou sin su garoti, segun Polis, ta pasobra e ta burachi atrobe.

Riba e forma di atende cune y e “politie optreden” no tabatin ningun comentario. Mas bien Polis kier comunica cu e homber no a bay cera pa ta burachi na pia, pero si a hib’e su cas pa su mesun bon. Den pasado, ta dor di cana burachi asina riba caminda, el a yega di cay y kap cabes, te cu mester a hib’e Hospital.