Diabierna, na momento cu Vocero di Polis a informa cu a suspende tres recherche di Departamento di Crimen Organisa y sin menciona e motibo, mesora den otro medionan a informa cu e lo por tin di haber cu e proceso di kimamento di droga cu tabatin e mainta ey. A puntra si acaso a “perde” droga of no a conta bon y cu ta di ey lo a suspende e Polisnan.
Durante e reunion na POVA awe mainta hunto cu sindicato SPA, a aclaria cu na ningun momento a perde ningun sorto di droga. Locual tabatin ta un interferencia entre Recherche Samenwerkings Team (RST) di Hulanda cu Unit Georganiseerde Criminaliteit (UGC) cu ta tras di e mesun sospechoso. Ta acusando e recherchenan di Cuerpo Policial Aruba di tin contacto cu baho mundo, pa cual a start un investigacion y den fin di siman a detene e sospechoso envolvi, un hende muhe bon conoci pa husticia local.
Te awo e recherchenan ta suspendi y prohibi pa drenta tur Warda di Polis mientras cu ta investigando nan. Entre nan tres tin como 80 aña di servicio y lealtad na Cuerpo Policial Aruba.
