Den un comunicado di prensa, Cuerpo Policial di Corsou a alerta comunidad di un estuche, “Phone cover” nobo, cu ta circulando. No kier lanta panico pero tin cu keda alerta.
Ta trata di un “kaft di celular” den forma di un arma di candela. Durante di un control di Polis un hoben, a bin topa cu un “Phone case” den forma di un arma di candela hinca den su saco. Kisas e hoben no tabatin intencion maligno, pero cu a causa consternacion y hasta cu chens di por a termina den algo hopi mas serio!
Cuerpo Policial di Corsou ta conseha y adverti, mirando e crimennan tumando luga na nos isla ruman, y cual hopi di nan ta keda cometi cu arma di candela, pa no cana cu nada cu ta parse of tin indicacion di ta un arma di candela. Polis no lo duda pa actua cu e determinacion necesario y e responsabilidad lo keda pa esunnan cu a scoge di ta den posecion di imitacion di un arma.
