Manera ta conoci, tur persona of organisadonan di eventonan social, deportivo of educativo, cu ta mara na un permiso, mester tene cuenta cu mester haci e peticion na tempo. Antes bo mester a haci bo peticion 10 dia di trabao prome cu e fecha di e evento. Desde diabierna 1 november 2019 esaki lo conoce un cambio. Esaki lo bira 12 dia di trabao prome cu e fecha di e evento.
Tene cuenta si cu diasabra, diadomingo of dia di fiesta NO ta conta den e 12 dianan aki. Tambe tene na cuenta si un persona of organisacion haci un peticion pa un evento y resulta cu e tin un permiso bieu cu no a ser busca ni paga, e lo tin cu paga pa esun bieu prome cu e haya esun nobo.
Peticionnan cu wordo entrega menos cu 12 dia di trabou (prome cu e fecha di e evento) lo no wordo procesa mes. E rekisitonan pa haci un peticon pa cu un permiso ta keda mescos. Polis ta pidi tur hende concerni pa tene bon cuenta cu e cambio menciona.
Cuerpo Policial ta subraya cu mester obedece tur ordo di Polis relaciona cu orden publico y Polis ta autorisa pa para e evento na momento cu orden publico ta rekeri esaki of na momento cu constata cu a viola cualkier di e condicionnan aki.
