Cuerpo Policial ta informa cu lo cuminsa controla pa cu e muchanan bou di 12 aña cu mester ta sinta patras den auto.
E control lo ta den tur bario na unda cu tin scol preparatorio y scol basico. E motibo ta cu Cuerpo Policial a ripara un aumento den accidente cu mucha menor di edad envolvi, entre otro mucha bou di 12 aña. Polis tambe a constata cu hopi biaha mayor y tur esnan cu ta transporta mucha bou di 12 aña, no ta pone e muchanan sinta patras y/of si nan sinta patras mes, nan no tin e faha di siguridad bisti of nan no ta sinta den un childseat manera ley prescribi.
Cuerpo Policial kier a conscientisa tur mayor, welo, wela y demas persona cu ta transporta mucha bou di 12 aña den auto, cu e mucha su bienestar ta na prome luga.
Pa logra esaki e mucha mester ta tin su faha di siguridad bisti of e mester ta sinta den un childseat (child booster) riba e sienta patras di e auto.
Conforme nos ley di trafico “ E chauffeur di un vehiculo di motor ta prohibi pa core riba caretera cu un mucha menor di 12 aña sinta dilanti banda di dje” y tambe “un chauffeur di un vehiculo di motor ta prohibi pa core riba caretera, transportando mucha bou di 12 aña cu no ta sinta patras den e vehiculo cu su faha di siguridad bisti of sea den un childseat (booster) apropia y bon instala.
Polis kier evita cu cualkier mucha sali herida den un accidente di trafico. Proteccion di e mucha ta conta pa den auto tambe.
Mayor y como tambe esnan cu ta transporta mucha bou di 12 aña ta na tempo pa busca y instala un childseat y tambe check si e fahanan di siguridad di e auto ta traha optimalmente.
