Polisnan bou guia di nan sindicato Sindicato di Polis Aruba (SPA), a manifesta nan malcontento awe merdia dilanti Warda di Polis na Playa.
E miembronan a informa sindicato nan malcontento pa dos factor. Aruba ta bibando den un momento cu nunca a yega di experencia. E ta un preocupacion pa henter pueblo, incluyendo polisnan cu tambe un ser humano y tin nan famia pa kende nan ta preocupa.
Jose Dirksz, presidente di SPA, e mainta aki a splica cu nan mester sigui haci nan trabou, cu tur e riesgonan cu esaki ta trece cun’e. Polisnan a pone placa hunto pa pone un bel dilanti, asina cada bishitante ta primi esaki y por controla e personanan cu ta drenta. Den esaki nan no ta mira problema y di repente a bini ordo di halto cu e porta dilanti mester keda habri. A trata di yega na un acuerdo cu leiding di Oranjestad pero nada.
Nan otro preocupacion ta cu e uniform di polis tin diferente parti di metal riba dje,locual ta haci e riesgo pa nan un poco mas grandi. Y ta haci e riesgo pa haya e virus mas grandi.
Esaki ta nifica cu nan ta pidi pa haci uzo di e uniform, cu ta e Poloshirt cu e nomber Polis riba dje. Basa riba resultado di e reunion nan ta bay reuni y wak cual ta nan siguiente paso. Dirksz ta kere cu coleganan di otro districto tambe lo uni na esnan di Playa. Nan ta compronde cu ley ta papia di e uniform oficial, esun di camisa, pero ta bibando un crisis unda mester evita mas tanto posibel cu nan ta keda contagia.
Tur districto tin mondkapje y handschoen, y hopi ta uz’e na momento cu nan bin den contacto cu publico.
