Polis Juni Cardoze a uza su arma reglamentario pa mata su famia

Ayeranochi (ora di Hulanda) a sosode un caso lamentabel di asesinato na Sterrenburg, Dordrecht na Hulanda. E sospechoso ta Wendell “Juni” Cardoze di 35 aña di edad, un Polis Arubiano, cu a tira su casa, Marjori Gressman tambe di Aruba, su dos yiu muhenan di 8 y 12 aña y despues a tira su mes. Awe Husticia di Hulanda a confirma cu a haya e arma reglamentario di e Polis y cu ta esey el a uza pa mata su famia y despues pone un fin na su propio bida.

Juni Cardoze a bira Polis na Aruba mas o menos na aña 2003 y despues di 5 aña di a traha den e districto di Oranjestad y Noord, a opta pa bay biba na Hulanda y sigui su bida eynan. El a logra bira Polis y tabata traha den un Flex Team, cu por uza den diferente seccionnan den Polis.

Reportahe: Hulanda conmovi pa crimen pasional

Reportahe: Hulanda conmovi pa crimen pasional. Click e link pa mas https://24ora.tv/2lFVcEx

Posted by 24ora on Tuesday, September 10, 2019

Rijksrecherche awor ta investigando si e tabatin permiso pa bay cu su arma di candela cas. Normalmente Polisnan mester laga nan arma reglamentario na trabou y si bay cas nan mester ta sigur di tin un kluis pa ward’e aden. Bisiñanan a conta cu e pareha ta den proceso di divorcio y tabata pasando temponan turbulento. Kico a conduci pa e Polis tuma un decision asina drastico, lo keda un misterio pa semper, pasobra tur testigo den e cas, a fayece.

Hopi forsa na famia di tur e 4 victimanan den e drama pasional aki na Hulanda.