Legalisacion di cannabis no ta nifica cu automaticamente lo conduci na menos delito, segun Polisnan Hulandes despues di un bishita na Canada. Esaki ta e conclusion saca door di un delegacion di Polis Hulandes despues di un bishita di trabou na Canada, cu a legalisa cannabis na october 2018.
“Pa loke ta criminalidad, te ainda no tin indicacion cu e sistema nobo di cannabis ta core cu e criminalnan,” ta conclusion di e experto di maneho Pieter Tops, profesor di “Bestuurskunde” na Universidad di Tilburg y docente di Polis y “Openbaar Bestuur” na Academia di Polis. “Pa aworaki ainda e ta un pregunta grandi si e sistema legal na Canada ta cla pa e poder y grandura di e sistema legal.”
Cu legalisacion di produccion y benta di marihuana recreativo, Prome Minister Justin Trudeau a perde un promesa importante di campaña. Segun e Premier Canades, e ley di casi shen aña bieu no tabata efectivo mas, pasobra den practica Canadesnan ta e usuarionan mas pisa di mundo.
E articulo publica den Volkskrant ta bisa cu Canada ta sirbi como ehempel pa Hulanda. E partidonan di coalicion den e di tres Gabinete Rutte a palabra durante e formacion cu na Hulanda por experimenta cu cannabis legal. Pa esaki, Tops tabata pa un bishita di trabou den area di Toronto, cu e presidente y secretario di Platform Drugs di Polis Hulandes. Su conclusion ta cu Canada e crea un sistema continuo pa e comercio di cannabis legal: companianan priva, cu mester busca un permiso, ta produci e marihuana. E entrega despues di e producto ta keda den mannan di organisacionnan gubernamental di e provincianan. E tiendanan por ta den man di Gobierno of comerciantenan.
Comercio ilegal
Gobierno Canades ta apela na usuarionan pa cumpra e producto legal. No solamente pa motibonan moral, pero tambe pasobra e cannabis produci bou vigilancia ta miho pa salud. Pero toch ta parce cu no ta logra frena e comercio ilegal cu e ponencianan aki.
Loke ta traha na fabor di e mercado ilegal na Canada ta algun circunstancia: nan por produci hennep cu un nivel di THC mas halto y cu ta mas furte. Productornan criminal no ta paga belasting. Door di esaki nan por bende e cannabis na un prijs menor di esun fiha pa Gobierno.
Riba mercado legal, un gram di marihuana ta costa casi 10 dollar Canades, riba mercado ilegal e ta costa solamente 6,50.
E sistema Canades conoce algun punto debil, segun e delegacion Hulandes a conclui despues di e bishita di trabou na Canada. Un parti di e cannabis ta produci ilegalmente, mientras cu un parti di esun produci legalmente ta disparce via di “porta patras” pa mercado ilegal.
Stroman
A resulta cu algun di e permisonan pa produci cannabis legal a cay den man di “stroman” di criminalnan. Y casi no tin un control riba e cultivo na cas, cu por tin produccion di grandura di un empresa.
Tops ta bisa cu den areanan di e produccion ilegal, e sistema legal tin problema pa funciona.
Mayoria di e funcionarionan policial cu a forma parti di e delegacion Hulandes, a mustra di ta sceptico riba e pregunta si lo logra reduci e parti criminal. Na Hulanda, Gobierno kier trata pa durante 4 aña laga tur koffieshop di 10 “gemeente” provee nan mes pa e cultivadornan legal. E meta pa combati e criminalidad tras di e koffieshopnan, tin asina hopi buraco cu e gemeentenan no kier participa.
E cinco ciudadnan mas grandi (Amsterdam, Rotterdam, Den Haag, Utrecht y Eindhoven), cu tin mayoria di e koffieshopnan, no ta participa bou di e condicionnan poni. Un otro profesor, Cyrille Fijnaut, a bisa cu e pensamento cu legalisando marihuana ta bay tin mester di menos Polis, ta algo cu e no kere lo bay sosode. “Mester di hopi Polis pa bringa e black market y protega e sistema legal”.
E mes a haci un investigacion na 2014: legalisacion no ta kita e black market y e crimennan relaciona cu droga cu esey ta trece cun’e. E interesnan ta demasiado grandi. El a duna e ehempel di California, unda e crimennan no a baha. Ademas, e negoshi ilegal ta keda existi y nan lo tin prijsnan mas barata. Di su banda Fijnaut no ta mira sentido den e experimento di 4 aña cu Gobierno kier haci. “E experimento ta mucho chikito pa un industria asina grandi.”
Na Merca
Pa awo, na Merca tin 11 estado y Washington, D.C., a legalisa e uzo recreacional di marihuana. Otro 22 estado – entre nan teritorionan Mericano di Puerto Rico y Guam – ta permiti uzo di cannabis cu metanan medicinal. Pero e ta ilegal na nivel federal. Pero un investigacion haci pa Pew Research Center na januari aña pasa, a duna como resultado cu 61% di e Mericanonan ta kere cu mester legalisa marihuana. Esaki a conduci na diferente cambio den e politica. Por ehempel, na juni 2019, Illinois a bira e prome estado pa legalisa e posesion y comercialisacion di marihuana recreacional via di ley, en bes via di referendum. Na januari, 2018, Vermont a bira e prome estado pa legalisa e consumo y posesion di marihuana recreacional por medio di un ley.
Te aworaki tin dos pais na mundo cu marihuana ta completamente legal. E prome tabata Uruguay y awo Canada.
Aruba
Na Aruba tin un lobbymento tumando luga unda cu partido RED ta pro, tanto recreacional como medicinal, mientras cu e partner mas grandi di e coalicion ta papia di solamente medicinal y controla. Partido POR tambe ta na fabor di legalisacion di marihuana medicinal, mescos cu partido AVP tambe den oposicion. Ta sinti toch cu un grupo ta mescla e uzo medicional y recreacional den otro. Parlamentario Ricardo Croes, e di tres votegetter despues di Mike Eman y Evelyn Wever ta convenci cu falta mas conocemento den comunidad riba e tema aki. E ta convenci cu alcohol ta haci mucho mas daño cu cannabis pero toch alcohol si ta legal.
