E Polis, Giovanni Gomez, trahando na Warda di Polis Oranjestad, wardando su nombracion como “Hoofdagent” ta encarcela. Fiscal ta haya cu e keho entrega contra dje di su pareha ta suficiente serio cu su libertad por stroba e investigacion. Su mesun coleganan di Bureau Integriteit & Veiligheid (BIV) a detene awe den dia, despues di basta rato di interogacion. Ta sospecha cu el a abusa fisicamente di su pareha, mama di su yiu. Ta acus’e di lo a haci esaki pa basta tempo caba, pero cu e señora nunca tabatin e curashi pa keh’e.
Famia di e Polis sospechoso awo ta sigura y tin prueba hasta cu e rolnan ta net lo contrario, esta cu ta e señora ta maltrata su casa Polis regularmente den cas. Recherchenan di e departamento cu ta investiga “internal affairs” den Polis awo lo mester arma e puzzel aki na otro.
Ta parce cu e relacion den e apartament unda nan ta biba ta hopi toxico. Aña pasa e Polis mes a keha su pareha na Recherche pa motibo di maltrato. Su famia ta pensa cu algo mester a pasa atrobe cu su “buchi” a yena di wanta tanto golpi sin kier dal bek dor di teme pa e mesun scenario aki.
Na inicio di e siman aki Mando Policial a suspende dos Polis pa e mesun acusacion, esta maltrato domestico. Sinembargo, nan a start cu Gomez y a dicidi di cer’e awe, pendiente d investigacion contra dje. E ta sospechoso ainda, mientras Polisnan lo mester verifica si e keho contra dje ta veridico y cu tin prueba su tras.
Polisnan sinembargo ta hopi demotiva con ta manehando investigacionnan interno den Polis. Decenas di Polis a perde nan trabou e ultimo 5 añanan aki, mientras tin algun cu ainda ta suspendi na cas sin cu nan caso a bin dilanti ainda. E ta duna un impresion cu tin un scarsedad di integridad den Cuerpo Policial.
E otro malcontento ta e forma con un reportero di un website chikito, pero masha yega na Minister di Husticia y yuda pa algun Polis, a publica riba Facebook for di weekend caba riba e caso aki. Den e proceso el a ataca Comisario Tjon, cu no ta ni na Aruba. Ta crea e impresion cu tin “politica” infiltra den Cuerpo Policial, den cual for di Ministerio ta uza medionan yega na Partido POR pa pone presion pa investiga y cera Polis.
