Tabata pa 3:56 am cu Stichting Maneho di Aruba su Carnaval (SMAC) a ranca sali cu e parada di marduga, conoci como J’ouvert Morning, den cayanan di San Nicolas. Polis a compaña SMAC den e parada, specificamente pa por garantisa orden publico.
Na tur, a conta no menos di 128 polis riba pia, parti den seccionnan manera Mobiele Eenheid, polis uniforma, departamento di recherche, personal administrativo, departamento di trafico y planologie, Arrestatie Team, Mobiel Commando y como tambe personal di Cuerpo Especial Arubano (CEA).
Despues di algun ora di bailamento y gosamento, di e dos bandanan musical y dos DJnan cu a percura pa move algun mil hende den e parada y algun mil hende para den banda, porfin pa 9:00 am e parada a yega su final.
Cuerpo Policial Aruba a raporta cu awe tabatin no menos di 19 detencion. Esey ta poco menos di e 21 detencionnan cu tabatin tres aña pasa, esta den carnaval di aña 2020.
E detencionnan tabata a base di tin arma blanco den nan poder, droga, bringamento, buracheria publico y tambe pa no sigui ordo di polis. E suma total di multa den Faya bo Haya a alcansa Afl. 12.970,-. E multa di mas halto duna na un solo sospechoso ta di Afl. 1.800,=.
