Polis buscando evidencia den cas di mayornan di mucha cu a fayece

Morto di e criatura di 5 aña a shock comunidad awe, specialmente pa e forma cruel cu a maltrata e mucha, den forma continuo.

E Padrastro, Gabriel Martin, conoci como Gaby, no ta desconoci pa husticia. A yega di cay cera na mas di un ocasion pa varios acto criminal, manera maltrato cu arma y hasta atraco. E mama, Richeila Frans, tambe ta deteni awo, bou sospecho di tin di haber cu morto di su yiu. Ambos ta biba pariba di brug.

Awenochi, Polisnan encarga cu e investigacion rond di morto di Rishandroh Anastacia di apenas 5 aña di edad, a efectua 4 diferente buskeda den casnan di interes. Mayoria di e casnan tabata pariba di brug, manera por ehempel na Weg Sero Preto # 16.

A tuma un auto tambe den beslag, un auto marca Toyota, modelo Tercel, color cora, cu number A-10733. Polis a transporta e auto pa Warda di Polis na San Nicolas, pa ey realisa mas investigacion forensico riba e auto.

Un di e motibonan pa realisa tur e buskedanan aki den casnan, cu permiso di Hues Comisario, ta relaciona tambe cu buskeda di un ruman di e victima, un otro yiu di e señora di apenas 3 aña di edad yama Eugene. Nan ta buscando su paradero, pero sin mucho exito. Ta bisa cu ora a detene e mayornan, e Padrastro a bisa e mama pa e no bisa nada. Ora a puntr’e unda e mucha ta, e mama a baha cabes y a cuminsa yora.

Famia di e tata di e yiunan a skirbi riba red social cu awetardi ora Polis a detene e pareha, cu nan tabata den plan pa scapa for di Aruba. Pues, e detencion a tuma luga net na ora, sino lo a perde e sospechosonan. Sinembargo, Ministerio Publico ta desmenti esaki.

Mientrastanto Polisnan a forma un ekipo completo di recherchenan cu ta investigando e caso, cu tin diferente fase canando paralelo cu otro. Por ehempel, un grupo ta investigando con e criatura a fayece, mientras cu un otro grupo ta investigando paradero di e otro yiu homber, Eugene, cu te ainda no por localis’e. Por spera mas movecion policial den e siguiente oranan.

Esaki ta e mucha perdi, Roshandrick “Eugene” Frans di 3 aña di edad

Cualkier persona cu por sa mas di paradero di e mucha, yama Polis mesora.