Polis Britanico ta aresta Assange tras shete aña den e embahada di Ecuador

A aresta e fundador di WikiLeaks, Julian Assange, door di polis Britanico y desaloha for di e embahada Ecuatoriano, despues cu e pais Suramericano a pone un fin di forma abrupto na shete aña di asilo, den un desicion cu su siguidonan a cualifica como ilegal.

Por lo menos shete agente a saca un Assange altera for di e sede diplomatico, kende tabata tin un aspecto fragil, cu cabey y barba blanco, mientras e tabata wordo hinca den un van.

“Julian Assange, di 47 aña, a wordo aresta awe diahuebs, 11 di April, pa agentenan di e Servicio di Polis Metropolitano (MPS) den e Embahada di Ecuador,” polis a informa.

Autoridadnan a bisa cu nan a aresta Asange despues di a wordo “convoca na e embahada pa e embahador, despues cu e gobierno Ecuatoriano a retira e asilo.”

E aresto ta marca e final di un di e gironan mas dramatico den e bida agita di Assange, aunke su siguidornan a bisa cu e revocacion di asilo di parti di Ecuador ta ilegal y tin miedo cu e por caba na Merca.

Pa algun, Assange ta un heroe door di expone loke e defensornan ta considera e abuso di poder di parti di e estadonan moderno y pa defende e libertad di expresion.

Pero pa otronan, e ta un rebelde peligroso cu a viola e siguridad di Merca. WikiLeaks a irita Washington door di publica cientos di miles di comunicadonan diplomatico secreto Mericano, cu tabata contene tin biaha comentarionan critico duro riba lidernan mundial, for di e presidente Ruso, Vladimir Putin, na miembronan di e famia real Saudi.

Assange a capta titularnan na nivel internacional na principio di 2010, ora cu WikiLeaks a publica un video militar Mericano clasifica cu a mustra un atake na 2007 di e helicopternan Apache y Bagdad, unda cu a muri decenas di persona, incluyendo dos trahado di Reuters.

Na 2012, el a refugia den e embahada Ecuatoriano na London pa evita wordo extradita pa Suecia, unda cu autoridadnan tabata kier a interoge den cuadro di un investigacion di agresion sexual.

E demanda a wordo retira na 2017, pero Assange a wordo deteni diahuebs pa incumpli e condicionnan di su libertad condicional original na London.

E abogado Sueco cu ta representa e presunto victima di violacion a bisa diahuebs cu e lo pone presion pa fiscalnan bolbe habri e investigacion.

Heroe of villano?

E relacion di Assange cu su anfitrionnan a ruina despues cu Ecuador a acus’e di filtra informacion riba e bida personal di e presidente Lenin Moreno.

E mandatario a bisa previamente cu Assange a viola e terminonan di su asilo. Moreno a afirma diahuebs cu e status di asilado diplomatico di Assange a wordo cancela pa un violacion ripiti di e convencionnan.

“Ecuador soberanamente ta finalisa e asilo diplomatico otorga na señor Assange (…),” Moreno a bisa riba un video publica riba Twitter.

“El a viola reiteradamente disposicionnan expresa di e convencionnan riba asilo diplomatico di La Habana y di Caracas (…), el a viola particularmente e norma di no interveni den asuntonan di otro estado.”

Moreno a bisa cu el a pidi Gran Britania pa garantisa cu Assange no wordo extradita na un pais unda e por enfrenta tortura of e pena di morto y cu e gobierno Britanico a confirma esaki por escrito.

“Julian Assange no ta un heroe, e tin añanan ta sconde di e berdad,” e minister di Relacionnan Exterior di Reino Uni, Jeremy Hunt a bisa.

“No ta cu Julian Assange a wordo reteni como rehen den e embahada Ecuatoriano, lo cierto ta cu Julian Assange a mantene e embahada di Ecuador como rehen, den un situacion cu tabata absolutamente intolerabel pa nan,” el a agrega.

Polis Britanico a confirma mas despues cu Merca a solicita e extradicion di Assange.

Di su parti, WikiLeaks a declara cu Ecuador a cancela ilegalmente e asilo politico di Assange, den violacion di e derecho internacional. Siguidonan di Assange a argumenta cu su salud ta daña pa tanto aña di bida den condicionnan complica sin acceso na luz di solo.

Edward Snowden, excontratista di e agencia di spionahe Mericano, a cualifica e aresto como “un momento scur pa libertada di prensa.”

Comments

comments