Polis Arubiano Juni Cardoze a mata famia na Dordrecht

Dialuna den oranan di anochi na Hulanda a bati alarma pa un caso grandi di asesinato unda cu lo tin mas cu un victima. Y a haya confirmacion cu e persona responsabel ta un Arubiano trahando como Polis na Hulanda.

E informe cu a ricibi ta cu e hecho aki a tuma luga na Sterrenburg, Dordrecht, despues di 6.30 di atardi (ora di Hulanda). Diferente instancia y unidadnan a wordo manda na e adres en cuestion pa tiramento cu a wordo scucha, unda cu bisiñanan mesora a bati alarma. A papia di tres persona y Polisnan no kier a duna informacion na prome instante, ya cu mester a warda esnan concerni drenta paden y confirma kico a pasa.

E situacion tabata dificil pasobra, segun a bisa despues, no a haya ningun hende na e sitio cu por a duna dato di kico a pasa.E datonan ta bisa cu aparentemente tin un problema entre e pareha y e Polis Wendell (Juni) Cardoze a saca su arma reglamentario y a los tiro riba su casa, kende a resulta gravemente herida. Despues a tira su dos yiu muhenan mata y e ultimo el a pone fin na su mesun bida. E casa di Cardoze ta Marjori Gressman di Noord.

Separacion

E pareha, segun por a compronde, pa basta tempo caba ta den problema cu otro y ta den proceso di divorcio. Apesar di esaki, nan a keda biba den e mesun cas, segun e bisiñanan a conta. Na famia di e fayecidonan ta bay palabra di condolencia.