No ta prome ni di dos, sino ta varios biaha caba cu husticia ta drenta na e compleho di edificio y apartamentnan situa na Palm Beach unda antes tabata Different Bar & Restaurant. Solamente cu e biaha aki a sali cu decenas di sospechoso deteni pa ta ilegal na Aruba, pa portacion di arma di candela y posecion di droga.
Awe marduga Team di Aresto hunto cu un ekipo di Mobiele Eenheid di Polis a sali pa un compleho di apartament na Palm Beach. A yega cu hopi Polis pasobra e indicacion tabata cu tin hopi asunto ilegal tumando luga eynan. Fuentenan a indica cu a topa cu varios arma di candela, un cantidad di droga y riba dje, no menos di 30 persona ilegal kedando den e apartamentnan situa tur rond den cura.
Polisnan a haya cooperacion di Cuerpo Especial Arubano pa transporta e detenidonan for di e sitio. Cu e detencion di awe mainta trempan, e centro di detencion di Warda nos Costa ta yena mas ainda. Mayoria di e ilegalnan ta procedente for di Venezuela, cu ta sigui cu su fronteranan cera.