Ayera tardi pa mas o menos 6:40pm Polis a topa cu un aglomeracion di hende para ta bebe cerbes pafo di Wei Pau Supermarket, situa den Caya Danza cerca di CITCO Sasaki.
A bira un custumber cu despues di trabou, trahadonan di algun compania ta cumpra caha di cerbes frieu y ta para bebe eyfo na baki di pickup. Ayera sinembargo Polis a para e “fiesta” y a manda tur hende pa nan cas! Durante e scual, Polis a mustra tur e bebedonan riba e reglanan estricto stipula pa DVG relaciona cu distanciamento social pa evita contagio di Coronavirus.
Cu 4 caso activo awe na Aruba, e isa mester adapta nos forma di biba na e “normal nobo” y evita aglomeracion den luganan publico. Para asina ta bebe hende ta pasa nister riba Bo y ata Bo contagia! E mesun scua a bay tambe pa doño di e supermercado, un descendiente di China, cu de facto lo spera di dje cu e conoce e reglanan aki bon. Polis a hala su atencion cu tanto bal ta plak sticker di distanciamento socia na vloer y na porta, si no tin un hende pa garantisa cu clientenan ta atene nan mes na e reglanan stipula.
De facto, den e ley ta bisa cu si un cliente no por of no kier aplica e reglanan stipula, cu doño di e establecimiento mester pidi’e pa bandona e negoshi. E grupo di bebedo a compronde e splicacion di Polis y a opta pa bay cas. Claro, no a bay laga e cerbesnan atras si.
