Polis a gara dos hoben riba veld di futbol na Bushiri cu revolver 357

Polisnan a pone man riba dos hoben cu tabata tin arma den nan poder y varios bala cayente. Esaki a sosode riba e veld di Mini Futbol na Bushiri. Polisnan a haya un tip. E muchanan ta hunga futbol riba e veld pero aki un persona eybanda a mira con un di e hobennan a saca un revolver pone un banda y djey subi veld bay hunga bala. E agentenan a sa di prepara cu varios unidad y asina yega cerca. Na momento cu nan a yega a rondona e veld. Ya caba e momento ey nan tabata tin indicacion kende ta esun cu tin arma di candela den su poder. Asina a yega para tur hende. A base di indicacion duna a logra yega na esnan responsabel pa e arma y bala. A haya e arma cerca ey mes. A detene dos di e hobennan cu lo ta biba cerca eybanda. E arma a resulta di ta un revolver caliber 357. Recherche tambe a presenta. Ambos sospechoso a wordo hiba warda di Recherche den Frankrijkstraat. Eynan a interoganan y ambos a keda sera tambe. Uno a wordo hiba warda di Santa Cruz y otro a wordo hiba warda di Shaba. Kiko ta e motibo cu ta cana rond cu un revolver den nan poder, esey ta algo cu nan so por splica. Importante ta cu a detene ambos y kita e arma di candela for di caya.