Polis: A drenta 5 cas awe pero nada di fugitivo ainda

Awe durante dia un ekipo di recherche di Santa Cruz a bishita diferente cas, buscando e fugitivo Erick Arturo Minguel Junior Schneiders, miho conoci como “Miguel”, naci na Aruba dia 29 di december 1994. Na tur Polis a drenta un total di 5 diferente cas en busca di e fugitivo. Ta trata aki di 2 cas na Meiveld, 1 cas na Piedra Plat, 1 cas na Tanki Leendert y 1 cas na Pavia. Despues di tur e bishitanan aki, ainda e defensornan di ley no a logra gara Miguel. E casnan ta di su mama, su wela y su tanta.

Polis ta corda tur hende cu articulo 2:146 di nos codigo penal ta papia di esun cu libera of yuda libera un persona cu tin un castigo di prizon, ta castigabel cu maximo 4 aña di prizon. Di otro banda, aunke cu no ta logrando pa gara e fugitivo, e recherchenan tin bon indicacion cu e fugitivo ta na Aruba ainda y ta consider’e un persona hopi peligroso!

Su mama no ta contento
Na dado momento a detene mama di e fugitivo tambe den e proceso, esta Niurca Kock. Tabata sospech’e di sa mas di su yiu of di lo tabata sa unda e yiu ta scondi. Despues di dos dia a laga e mama bek den liberad.

Awo a detene e ruman muhe

Awor cu dianan ta pasando y ainda no por logra gara e fugitivo, a opta ayera pa detene e ruman muhe. A bay su cas y a listra tur rond, sin topa cu e fugitivo. A opta e ora pa bay cu e ruman muhe pa investiga si e por sa mas di e paradera di su ruman homber Miguel.

Mucha malo a keda su so atras

Contrario na otro casonan, e sospechoso cu ta deteni desde diahuebs anochi, ta mama di un mucha di apenas 5 aña cu ta sufriendo multiple retonan cu su salud. E tin retonan cu halamento di rosea, cu curason y mas. E wela a conta cu Dokternan na Aruba a haci un mal trabou y na Colombia a logra scapa e criatura. Su mama, cu awor ta deteni inhustamente, na opinion di e wela, ta e unico cu sa con pa atende cu e yiu malo aki. Polisnan no a tene cuenta cu e aspecto aki y a djis detene e mama bay cune lagando e yiu malo atras riba cama.

Dicon Polis no ta investiga nan mes?

Pa mama di e sospechoso ta asina straño cu te dia di awe, niun dia Polis a bin cerca dje pa splica con e yiu a scapa. Con Polisnan a haci un mal trabou, a laga un preso huy for di nan mesun Warda di Polis y awo kier drenta kibra cas di hende mas di un biaha, sin por haya nada. E ta sinti cu kier pasa e eror di nan riba otro hende, siendo cu te awe no a tende cu un Polis a bay cera, suspendi of investiga pa laga preso huy. Ta den nan cas nan mester investiga kico a bay robes, y no na cas di hende inocente, segun e mama a bisa awe rabia.

Niurca Kock: Mi no a tende di Miguel niun dia

E mama a sigura awe cu e no a tende di su yiu durante henter e asunto aki. E mes tin su dudanan ainda si e yiu ta aki, pasobra e lo a yam’e of lag’e sa cu e ta bon. Durante e ultimo simannan, ni un dia el a tende di e yiu. El a bisa cu su yiunan ta grandi y scapa y cu cada ken ta responsabel pa su mesun actonan. E ta pura pa e odisea aki pasa pa caba, pasobra awor constantemente Polis ta yega kibra drenta den su cas, di su mama y demas famia, siendo nan no sa di nada di paradero di Miguel.