Polisnan di Playa tabata riba e caminda di Madiki direccion Bushiri, Pos Abao. Net na e rotonde nobo, poco prome cu Fantastic Garden, nan a mira un auto color bruin, A-29385, coriendo.
A bay haci un control riba e auto aki. Na momento cu a para e chauffeur, a nota cu e tabata actua sospechoso y a mira tambe cierto cosnan straño den su poder. A pidi’e pa listra den su pertenencianan, locual no tabata problema.
Durante listramento a bin topa cu droga. A hay’e cu cierto cantidad di droga y esey a duna motibo tambe pa nan bay over na detencion. Polis a detene e chauffeur y pa motibo di posesion di droga.
A dicidi tambe cu lo transport’e pa warda den Dogcatcher. E chauffeur no tabata masha contento, pasobra e ta bisa cu ta net e ta buscando trabao y e tipo di cosnan aki ta perhudik’e pasobra asina aki e ta sali den publicidad y e no por haya trabao. Awo polis ta par’e cu droga y por hink’e den problema pa e por logra haya trabao. Esey no a stroba polis di haci su trabao y sigui cu e proceso di detencion.
A confisca un cierto cantidad di droga, suficiente pa bay over na detencion. Droga ta prohibi. Esey ta e motibo cu polis a actua segun ley. Aparentemente ta cierto cantidad di marihuana e tabata tin den su poder.
E auto a keda para cant’i caminda, despues cu polis a transporta e sospechoso pa warda. Probablemente lo no keda mucho ora cera, despues di un proceso di interogacion. E chens ta grandi cu nan lo lag’e bay.
