Polis a detene menos hende riba caya ayeranochi

Ta parce cu porfin e mensahe a cuminsa yega na comunidad of dor cu ta den siman, cu e cantidad di hende cu toch ta opta pa subi caya ta bahando. Contrario na e otro dianan, ayeranochi pa awe marduga, Polis a detene no mas cu 8 sospechoso. Ta acusa nan di ta riba caya durante Toque de Queda, sin cu nan tin un motibo real pa ta riba caminda publico.

Manera ta conoci, na momento cu Gobierno a emiti e “Toque de Queda” entre 9:00pm y 6:00am, a menciona cu tin excepcion pa ciuidadanonan bayendo Hospital, botica of cu a caba di sali di nan trabou of ta bayendo nan trabou. Pa esey nan mester tin carta di trabou y mester informa adelanta.

https://www.facebook.com/24ora/videos/223867018829093/

Gobierno ta haciendo hopi esfuerso pa por contene plamamento di e virus aki y pa esey e miho remedi ta di keda cas y no tin contacto mucho cerca cu ningun hende. Mester tene cuenta cu normalmente curpa di hendenan mas hoben ta miho resistente na e virus y su efectonan. Pero un hende hoben por plama e virus y contagia un hende di edad halto cu si no tin nada resistencia, hincand’e den problema serio cu su salud, di cual hasta e por fayece.