Ayera diamars 24 di maart tabata e di 4 dia di TOQUE DE QUEDA. Cuerpo Policial un biaha mas tabata bastante ocupa y a haci detencion den diferente districtonan. Total a detene no menos di 29 persona.
Pa 9:00pm e prome detencion a cay pa loke ta e TOQUE DE QUEDA na Ponton. Despues di esey tabata tin mas detencion cu a tuma luga na varios parti di Aruba.
Tambe polis tabata man yen pa loke ta candela den diferente bario. A topa cu barinan cu sushi cla pa wordo kima na Seroe Patrishi, tambe mas den anochi na Madiki y tambe riba Watty Vos Boulevard. Brandweer a presenta na e sitionan y paga e candela.
Polis a haya nan mes confronta tambe den e dos ultimo dianan cu clabonan riba caminda y hasta obhetonan manera bloki, palonan cu clabo den nan poni riba caminda.
Cuerpo Policial ta corda cu ora ta papia di TOQUE DE QUEDA ta algo hopi serio y mester cumpli cune. Esaki kiermen no ta permiti pa Bo ta riba caya. Ciudadanonan mester keda cas. E TDQ ta cuminsa di 9:00pm te pa su mañan mainta 6:00am. Tene cuenta cu esaki!
Aruba ta pasando den tempo dificil pa loke ta e Coronavirus (COVID-19). Ban respeta leynan y corda riba loke ta e multanan en conexion cu e TDQ. Esaki por yega te na un multa maximo di Afl. 10.000,=.
