Awe marduga den careda di 1:00am Polis a presenta na un cas na Boegoeroei, pa un fiesta ilegal na un cas. E fiesta ta yama “We fit” y a bende carchi cu como 200 hende, incluyendo menornan di edad. Tabatin pelea pafo, pa cual a rekeri presencia di e defensornan di ley.
Parce cu un artista local masha conoci tambe a canta na e fiesta, loke pa awo ta contra ley! Polis a topa cu hopi menor di edad den e fiesta. Organisadonan di e fiesta priva a pone tur invitado para nan auto den e parkinglot di Compleho Deportivo Frans Figaroa pa evita cu Polis y bisiñanan haya sa unda e fiesta ta.
Tabatin hasta un persona cu a keda para den e parkinglot pa guia e invitadonan cu mester a paga nan carchi adelanta, pa unda nan mester cana pa yega e cas priva.
Tipo di fiestanan asina na cas a lanta cabes masha den e pandemia aki. Ta parce cu nos hendenan no ta realisa e peliger di no tene distancia social y ta recori na fiestanan ilegal. Tur fin di siman Polis mester kibra tipo di fiestanan asina, cu ta causa molester tambe pa e becindario.
