Dios, mi ta pidi bo cu amor;
Pone tur inspiracion den nos mente y trece claridad den nos pensamento,
pa nos por skirbi cada dia mas consciente y coherente,
den nos dushi idioma Papiamento.
Tuma tur control di nos lenga, nos oracion, nos expresion,
nos palabranan y di tur nos sintimento,
laga nos perfuma nos pueblo cu poemanan
cu n’ contenido y mensahe mas profundo, perfecto y directo.
Tata cu ta na cielo, Abo cu ta scucha nos pidimento,
Abo cu ta compronde nos oracion na Papiamento;
Nos kier ta e Poeta di Patria cu ta lansa palabra
manera flecha dirigi directo na e curason di nos pueblo.
Nos mester comparti tur nos rikesa y tur loke nos tin acumula paden,
cu ta kima nos manera bol’i fuego.
Proteha tur nos custumbernan y tradicionnan,
no laga nan bay perdi of warda den un cashi sin recuerdo.
Proteha nos suela, elimina tur frontera, bay cu tur pena,
nos no kier mira Aruba ta pasa den sufrimento.
Cu nos Poder di Palabra por kibra cadena y hamas permiti
pa scucha zonido di guera y caba cu tur miedo.
Laga cu nos dushi Papiamento, cu ta e bos di nos pueblo,
por resona den eco den henter e universo,
pa mundo por compronde loke nos ta comparti, comunica y transmiti,
cu nos expresion den cada verso.
Duna nos e sabiduria suficiente pa nos por ta mas cu eficiente y concreto
Sin importa si e lineanan ta largo, pero cu palabranan honesto,
cu e mensahe cu nos mester comparti di tur loke ta haci nos orguyoso y contento,
manera ta nos talento.
Laga nos habri tur entendimento, yuda nos transmiti tur sensacion y sintimento,
pa para keto un momento
y no permiti cu friu, incoherencia y mal uzo di palabranan,
laga cu nos poema bula bay perdi cu biento.
Nos ta pidi bo por fabor, duna nos e tono mas perfecto di nos bos,
pa caricia e horeanan di nos pueblo,
laga cu nos frasenan sea manera e pan di cada dia
cu ta alimenta nos tera cu amor profundo y berdadero.
Pone tur pasion, lag’e brota cu ilusion, no permiti pa nos perde emocion,
laga nos ta honesto y sincero,
den tur poema pa nos dushi tera, nos Himno y nos Bandera,
skirbi cu tur e bunitesa di nos cielo.
Nos Dios y balansa, nos kier ta e speransa,
e bos di nos alma cu ta canta cu confiansa y cu accento,
e luz cu ta trece claridad den nos mirada,
e spiel cu ta mustra di nos cara tur e miho refleho.
E melodia cu ta nace cu alegria suplando manera biento,
manera awa cu ta brota den desierto,
e zonido mas placentero, manera ta e ritmo di nos folklore
y tur zonido saca golpiando e cuero.
Mi Dios eterno, habri tur wowo cu ta mara pa realidad,
penetra den profundidad di tur ser cu ta yorando,
habri nos hala manera warawara,
laga nos bula halto y cambia nos mentalidad, rumbo y pensamento.
Yena nos tera cu bendicion di awacero,
cu melodia, calor, expresion y tur e color di nos lenga materno.
Laga nos comunica cu otro na Papiamento,
e ta den nos man, nos boca, nos bos y den nos entendimento.
Nos kier ta manera un lenso, cu por seca tur lagrima di tur yiu di tera
y ciudadano cu ta sufriendo,
nos kier ta e Arte di Palabra cu nos hobennan ta canta,
hib’e den e alma declamando sin limite, ni miedo.
Nos ta pidi bo un boca di palabra, pa pone den nos boca,
tur palabra di mas amoroso, valioso y berdadero,
cu nos por toca tur curason cu ta bati di tur habitante,
di chikito te na grandi di nos Patria eterno.
Nos mester bo yudansa, nos tin tin tur speransa,
cu bo palabra por tuma control y cumpli cu nos deseo,
si otro no por compronde nos completo, nan por mira nos berdad,
den nos bos, ritmo y tono placentero.
Laga nos hunga cu palabra y cu rima,
manera un parha por hunga un baile romantico y poetico cu nos biento,
pa nos por transmiti tur e calor di nos dushi suela
den nos combersacion, educacion y na tur momento.
Dios maraviyoso y Ser Supremo,
Abo cu ta sinta ta goberna den cielo, esaki ta nos ultimo deseo,
laga nos inspira den nos naturalesa, laga nos elogia nos tera,
respeta nos dushi suela su soño y anhelo.
Laga cu Aruba por manifesta eternamente den tur nos pensamento
y keda graba como e miho recuerdo.
Wak mi directo den mi wowonan, mira mi berdad, busca den profundidad
y scucha mi curason su batimento y pidimento..! Amen.
