E recepcion di refugiadonan Venezolano ta sigui ta responsabilidad di Corsou y Aruba, pero, manera acorda na final di e Consulta Interparlmentario (IPKO), e gobierno di e cuater paisnan mester sigui explora posibel solucionnan pa e problemanan deriva di e fluho di refugiado y migrantenan for di Venezuela.
E delegacion Caribense lo tabata kier a mira cu e cuestion pa e asunto di reino wordo releva, pero Hulanda no kier tende. E delegacion Hulandes a reconoce plenamente cu e fluho di refugiado y migrante tin consecuencianan social y financiero pa e comunidadnan di Corsou y Aruba. Tambe tin preocupacion riba e imagen internacional di e paisnan, en particula atrabes di fuerte critica di e organisacionnan di derechonan humano.
E delegacionnan a acorda di informa otro mutuamente, entre e IPKOnan, mas frecuentemente riba e desaroyonan actual cu ta rekeri e accion di e gobiernonan.
Por ehempel, e parlamentarionan lo sigui, con Gabinete Rutte lo maneha cu e peticion na e gobierno di Reino pa e asistencia financiero y tecnico cu Corsou tin planea pa haci pronto a base di Statuut.
E lista di acuerdonan ta confirma cu e delegacion di parlamentonan di Caribe, no por a convence nan coleganan Hulandes pa hunto adopta un posicion riba e proyecto di ley di Reino riba Koninkrijksgeschillen. No tin nada mas pa nan sino spera cu e proyecto di ley por wordo modifica atrabes di amiendanan den Tweede Kamer.
Tambe a acorda cu den gruponan di trabao lo analisa e knelpunten den relacion dentro di Reino y con por soluciona esaki. Un otro grupo di trabao conhunto lo bay aborda e consensus-rijkswetgeving. Riba e invitacion structural di observadornan independiente den eleccionnan, no a haci ningun acuerdo concreto.
