Den un programa radial na TOPFM, lider di partido MEP y prome minister di Aruba mr. Evelyn Wever Croes a splica tur e caminda cu a cana pa evita mas problema cu e tema di spearfishing y den Gobierno. “Hamas ami, siendo minister, lo laga cu parlamento tin cu yamami 4 biaha prome cu yega na un solucion,” e mandatario a bisa.
Den e programa aki por a sinti, cu e forma di papia di e politico, cu di berdad e capitulo cu Marisol Lopez Tromp ta cera. Inclusive por a scucha con e minister no ta contesta ni mensahenan di e prome mandatario di Aruba. Ta mesun cos a sosode cu parlamento cu cada biaha mester a yam’e y otro dos ministernan pa bisa nan kico parlamento kier logra pa e tiradonan di pisca, sin viola tratadonan.
Parlamentarionan di MEP a bisa cu nan a sinti cu e minister a chercha di nan. A duna diferente sugerencia pa solucion, pero riba tur e mandatario tabatin obhecion. Esaki ta loke a haci cu ponemento di awa den biña no tabata posibel mas pa MEP.
Niun reaccion
Durante dos dia, dialuna y diamars prome minister di Aruba a trata di haya minister Lopez Tromp pa un combersacion. “Pero awe nos tin cu rond af e capitulo aki pasobra no por sigui asina,” Wever Croes a bisa.
E solucion cu a yega na dje den Conseho di Minister ta pa scoge un area leu di costa, unda no ta causa daño na coral y no ta viola tratadonan, tur minister, inclusive minister Lopez Tromp a bay di acuerdo cu esaki. E siguiente dia cu e mandatario a bay parlamento, un biaha mas, apesar di e reunion un dia prome, e ta mustra di no tabata completamente di acuerdo cu e solucion. A bisa cu parlamentarionan ta fors’e di kibra ley y di bay contra Tratadonan internacional.
Loke prome minister no por compronde, di con Lopez Tromp no por a bati na su porta y inform’e cu e tin informacion nobo y cu e no por bay di acuerdo cu e solucion proponi. “Mi porta ta habri te mey anochi y tur minister sa esey. Loke a pasa den parlamento siman pasa, mi ta lamenta profundamente. E por a wordo evita cu un miho comunicacion y dialogo habri pa e tema di spearfishing cu nos tin lunas trahando riba esaki. Mi kier sa di con el a scoge pa bay un confrontacion y cherche di parlamento cu a causa iritacion cerca fraccion di MEP y POR cu a bini cu un mocion di desconfiansa.”
E otro cos ta interpretacion di legalidad di e mocion. Wever Croes, sin bisa si e mocion ta legal of no, e ta haya cu Lopez Tromp no por ignora cu tin un problema serio, unda cu e fraccion di POR, cu ta esun cu a scoge pa ta minister, a expresa cu nan no tin confiansa den dje mas. “Na cualkier pais di mundo un minister cu haya un mocion di desconfiansa, ta tuma honor na su mes y ta retira. Na Hulanda, el a pasa varios biaha. Na Corsou tin Suzy Romer cu a retira.” Banda di POR, e fraccion mas grandi den parlamento cu ta MEP tampoco tin confiansa den dje. Tin un falta di confiansa hopi grandi y esey ta loke e mandatario aki ta bisa e kier papia cu Lopez Tromp riba dje. No solamente esey, pero tambe e actitud di Lopez Tromp a causa cu el a hinca henter Gabinete den problema. Na e momentonan aki no sa si hiba un presupuesto supletorio parlamento, y si e tin algo di ministerio di Lopez Tromp den dje, kico e organo lo bay haci. “Tin chens cu tin un parlamento hostil aworaki cu tur loke cu Lopez Tromp a bini cu ne y mi tin cu bay papia cu ne riba su actitud cu tabata totalmente innecesario. Mi a pidi pa den e retonan cu ta pasando aden, no busca crisis innecesario.”
Si prome minister a bisa cu e lo papia cu Marisol Lopez Tromp, “a menos cu e sigui core pami. Ami no ta core tras di hende, pasobra nos tin otro crisis pa atende. E mester bay splicami con e ta kere cu e por sigui traha den un gobierno y un parlamento di e forma ey. Ta e a bisa pa kita su nomber for di e papel pasobra e no ta bay ehecuta e solucion ey.” El a keda ripiti cu el a tene un Conseho di Minister un dia prome cu e reunion pa evita drama den Parlamento y toch Lopez Tromp ta bay ta hacie. Lopez Tromp a bisa cu e kier keda den Gobierno, pero prome minister a reacciona bisando “aki no ta one woman show pero un gabinete di 8 minister cu mester traha hunto. Awo, sin cu mi a papia cu ne ainda, mi no ta mira un forma factibel pa e keda den Gabinete despues di e confrontacion cu el a busca cu Parlamento.” El a expresa di ta lamenta tambe cu Lopez Tromp ta core p’e. E ta crea un sensacion, drama, crisis y despues core bay, comunica solamente via di prensa. Esaki un hende grandi no ta haci. Pero si e sigui haci’e, mi tin mi caminda pa cana.”
