For di aña 2015 Gobierno no a cambia e plachi di number di auto mas. Awo cu e sistema nobo aki a nota cu automobilistanan no ta cumpliendo cabalmente cu pago di impuesto di caretera. Segun Meverly Romano, Vocero di Departamento di Impuesto, e motibo di esaki por ta diferente. Por ta cu e automobilista no ta worry pa paga su belasting, por ta tambe cu su situacion financiero no ta permiti’e. Por compronde esey, pero asina cu un persona tin un auto, e tin obligacionnan cun’e. Mesun cos ta conta pa e obligacion di seguro, obligacion di keuring, etc.
Ta bin aserca cu tin hacimento di wega tambe, por ehempel a nota cu a falsifica e plachi blauw na diferente forma. A ripara cu tin hopi plachi cu ta den forma di sticker, uzando otro tipo di material.
E hecho cu a dicidi pa no cambia e plachi number tur aña a causa e efectonan aki, a causa e parti negativo aki. Esey no mester ta asina, pasobra un persona cu ta responsabel cu su belasting, no ta bay haci algo asina. Pero el a bira manera un tipo di free for all.
Alabes a ripara tambe cu hasta e sticker mes ta wordo falsifica. Di parti di Cuerpo di Polis a haya nan varios biaha ta verifica cierto stickernan dudoso cu a detecta durante control. Di biaha a ripara cu e stickernan ta falso. Pa e parti di control di sticker tambe a bira hopi fastioso pa polis y p’esey awor aki a dicidi cu Minister Xiomara Ruiz-Maduro, cu ta bay bek na plachi nobo. Lo introduci plachinan nobo pa aña 2019 y ta spera e ora cu ta elimina e fenomenonan negativo aki.
Siguridad riba caya
Segun Meverly Romano, a wak e problematica mas leu. Tin dos cos cu ta bay hunga un rol hopi grandi pa e clientenan aki, cual ta esunnan cu no a haci pago. E clientenan cu ta cumpli debidamente, por kita sombre pa nan, mirando cu nan ta hopi responsabel pa nan debernan. Esaki ta pa e grupo di esnan cu no ta cumpliendo. Nan ta bay haya un djis aki un cobransa adicional, plus 50% di boet. Na momento cu cuminsa acepta pago di e belasting riba vehiculo di motor pa aña 2019, no ta permiti pa paga e number nobo, tanten cu no a caba di paga tur e debenan bieu cu tin. Awor aki si tanto aña, un of dos of mas aña no a haci e pago riba belasting, awo aki ta bay yega e momento cu mester cumpli y financieramente e por cay mas pisa, pasobra no lo acepta pago pa 2019, tanten cu 2017 y 2018 ta completamente paga.
Plachi di number lo ta diferente
Pa aña 2019, e color di plachi lo bira oraño cu blanco. E background ta oraño y e letter y cifranan ta color blanco. A haci cierto cambionan na e plachi, por ehempel den e tipo di cifra, e tipo di letter cu tin riba e plachi. E color lo bay ta di material reflectivo. E ta reflect ora cu luz dal riba dje. E costo lo ta un tiki mas.
Pa ki tempo
Segun Meverly Romano, normalmente Departamento di Impuesto ta habri posibilidad di pago na cuminsamento di December, pero e plachinan ta calcula cu lo por cuminsa parti nan na mita di December. Esaki ta algo tentativo si. Tin cu mira ainda si ta logra, pasobra no mester lubida cu e cantidad di vehiculonan di motor ta bira aña pa aña mas hopi. Awor aki tin un total di 85.562 vehiculo di motor registra den tur e categorianan. E ta keda crece aña pa aña. Ta purbando awor aki pa toch otorga e plachinan pa den e mita di December mas of menos. Pero esey ta e idea te awor aki.
Tarifa ta keda mescos
Te awor aki e tarifa ta keda mesun cos. Romano no por a duna mucho detaye si lo bin cambio of no, pero te awor aki e prijs ta keda igual.
Sistema di sticker
Pa loke ta trata sticker, no ta bay tin sticker mas pa 2019. Ta bay bek na e plachinan manera cu ta custuma cun’e. Ta elimina e sticker!
Den futuro
Pa 2020 ainda no por duna ningun detaye concreto. Esey lo tin cu evalua despues. Pero pa awor aki, pa 2019, sigur lo bay tin plachi nobo pa tur e vehiculonan di motor cu ta haci uzo di nos careteranan.
