Piscadonan preocupa cu perdida di espacio na hotel den construccion na waf chikito

1426

Stichting Rancho y piscadonan ta hopi preocupa di kico ta e intencionnan cu Gobierno por tin pa cu e Pier di Piscadonan na waf chikito. Ta hopi informacion tin ta circula relaciona cu esaki, pa cual Stichting Rancho su presidente Clifford Roza a dicidi di bini dilanti pa recorda e historia di e area aki yama Pier di Piscado. 

Roza a conta cu e area tin un historia tras di dje cu mester lucha pa conserva. E stichting tabatin un tempo caba sinta na mesa cu Aruba Ports Authority y un inversionista. Pero dado momento mester a bandona mesa pa motibo cu no por para tras di e ideanan cu e inversionista tin. Pa e motibo aki Roza y e fundacion ta pidi atencion di Gobierno riba e asunto aki. 

Piscadonan preocupa cu perdida di espacio na hotel den construccion na waf chikito

Piscadonan preocupa cu perdida di espacio na hotel den construccion na waf chikito

Posted by 24ora on Tuesday, August 11, 2020

El a duna ehempel cu e parkeerplaats eybanda semper tabata uno publico. Awo nan a mira cu tin trabou andando cu ta bay haci un transformacion completo di esaki, sin tene cuenta cu logistica di e area unda hendenan ta bin cumpra pisca eynan. Awo no tin acceso facil mas pa yega na e pier. E beach cu nan ta cuidando tambe nan tin miedo cu lo tin atencion di inversionistanan.  

El a recorda cu e terenonan aki no ta di APA pero a haya esakinan pa maneha nan den nomber di Gobierno, pues no por sin mas kita esaki y su acceso publico, pa loke ta e parti banda di Pier di Piscadonan. A haci un yamada caba na Minister di Infrastructura riba e asunto aki. 

E hotel den construccion banda di e pier, kier haya area extra di acera pa pone nan parasolnan unda e huespednan por sinta. No ta compronde pakico esaki ta necesario, siendo cu nan por crea un area riba nan dak y ta haya un miho y bunita bista riba henter e area. 

Pues ta insisti pa e caminda mester keda liber pa ciudadanonan cu ta cana y keiro anochi. Aworaki kier duna e piscadonan solamente dos vak pa staciona. Nan pregunta ta di con e hotel no a crea su mesun area di stacionamento.