Piscadonan: Ley di naturalesa aplica inhustamente

Piscadonan ta esun perhudica y ta buscando nan derecho

No ta di awo nos piscadonan ta sufriendo di e inhusticia cu ta kitando tradicion y pan for di boca di nos piscadonan. No ta di awo nos piscadonan ta pidiendo pa cambia e ley di prohibicion di harpun. Desde 2001 ora cu prome cu cambio di gobierno a pasa e ley sin consulta piscado, sin informa comunidad y sin concientisacion y participacion debido di niun instancia, cu piscadonan a trata na tur sorto di manera di pidi gobierno cambia e decreto ministerial AB 2001 no.115. A haci tur sorto di intento. Accion di firma, haci proposicion na gobierno, protesta, skibi comunicado y mucho mas, pero tur a keda envano. Parce cu un grupo elite, kisas marioneta di interes aheno, ta frustra e intentonan tur biaha cu excusa fofo.

Articulo 14 di SPAW:

Ta papia di tratadonan internacional pero niun, ningun, ni un, tratado ta papia di prohibicion di spearfishing! Ta papia di tratado internacional cu mester protehe naturalesa, pero no ta bisa cu por ehempel articulo 14 di SPAW protocol ta proteha piscado tradicional anto esaki NO a keda respeta den e ley di proteccion di naturalesa. Articulo 14 di SPAW protocol, ta duna espacio pa haci excepcion pa piscado tradicional por sigui cu tradicion y gana su pan. Ey ta unda e Ordenansa di Proteccion di Naturalesa y tur e decreto ministerial (LBHAM) cu a colga bou di dje, ta faya y ta inhusto contra piscado. Ey ta caminda derecho di piscadonan tradicional no a wordo respeta.

A pasa ley pa pasa ley:

Ta papia cu no tin ningun informacion of data. Awo con a introduci un ley cu ta mara na tratadonan internacional sin ningun data y sin scucha of envolvi stakeholder (piscadonan)?

E director cu sombre a bisa bon cla cu no tin Data ni tabata tin estudio. Awo ta con e, e comision y Gobierno(nan) por papia of bisa cu tin especie den of cerca di extinsion si bo mes a declara cu no tin data? Esey ta “foul play”! Pasa ley sin tene cuenta cu derecho di piscado tradicional.

Motibonan valido pa cambia e ley:

Tin suficiente motibo valido, pa e departamentonan concerni tuma e peticion di piscado, di pueblo y di su representantenan na serio y drecha e ley inhusto ey. Drecha e inhusticia cu tin contra piscado. Tur gobierno a haci peticion pa cambia e ley. Tabata tin mocion unanime den parlamento pa cambia e ley inhusto. E ley inhusto a keda demostra cu no ta funciona manera premira y ta inefectivo, un perdida di esfuerso y placa pa enforsa y cu te dia di awe, niun hende por hustifica dicon mester prohibi e metodo di piscamento ey, diciendo cu tin forma di regula y ehempel rond mundo unda esaki ta ser haci.

Descriminacion:

Ta incomprendibel con algun departamento y instancia gubernamental ta descrimina contra piscado asina. Piscamento ta nos tradicion. E ta forma un parti grandi di entrada di hopi hende. Prohibicion no ta automaticamente proteccion. Piscadonan ta kere cu por regula e asunto masha bon pero no ta tuma nan peticion na serio pasobra nan ta humilde y trahado. Piscado no ta sinta den oficina traha of warda ley, anto cobra fin di luna manera e ambtenaarnan elite den e instancianan cu ta bringa piscado. Piscado ta sali lucha contra elemento pa trece su pan di cada dia cas. Duna piscado un chens husto y stop cu e inhusticia di e ley di prohibicion contra piscado ey. Ban uni. Man na obra!

Como piscado kisas a bira ora pa nos tambe uni y sali protesta. Como piscado nos ta wordo reta pa algun ambtenar pa sali y protesta tambe. Como piscado, nos mester cuminsa uni pa bringa e asunto aki mas fuertemente pasobra parce cu e no ta ser trata na serio.