Campeonato HEINEKEN fast pitch di Aruba Softball Bond dedica na dos baluarte jacobo Jansen y Gilbert “nando” Maduro a continua riba veldnan na Pos Chiquito.
Piratas despues di a elimina White Joker a inicia su serie nobo di best out of 3 contra Black Joker unda e ganador di e serie aki lo topa Logros den un serie di 5 wega den e gran final pa campeon di Aruba. Piratas desde promer inning a anota 3 careda y a amplia esaki cu 4 den di dos y 4 mas den cabez di 3 y nunka mas a mira atras.
Boxscore final Piratas 14 careda, 9 hit, 1 error y ta laga 4 coredor na base. Black Joker 1 careda, 5 hit, 3 error y ta laga 7 coredor den circulacion. Mihor bateadornan pa Piratas ta Jonathan Barry 2-1 cu un doblete, Franny D’Oleo 3-2, Leyvis Gonzalez 2-2, Dimas Santos y Henry Heredia ambos di 1-1. Pa Black Joker a destaca na plato Oslin Bergrok, Roderick Simon, Juan Carlos Maduro tur di 2-1, Eldrick Maduro y Lorenzo Maduro ambos di 1-1. William Benitez ta bay complete enfrentando 17 bateador lansando 55 pitch permitiendo 1 careda tras di 5 hit ponchando 2 bateador y ta regala 1 base por bola pa pone e victoria riba su nomber pikando asina ariba 1-0 den e serie di 3.
Eldrick Maduro ta enfrenta 20 bateador tirando 44 bola, 35 strike permitiendo 11 careda di cual 9 ta limpi tras di 5 hit y ta regala 6 base por bola pa bay cas cu e derota riba su nomber. Lorenzo Maduro ta drenta releva y ta permiti 4 hit mas 3 careda. Weganan ta continua e siman aki riba tereno di Pos Chiquito.
