Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba canchanan di Pos Chiquito.
Den categoria A-Klas Piratas vs Logros batayando den e gran final pa campeon di Aruba den un serie di best out of 5. Piratas tabata liderando e serie 2-1 y pues cu un victoria lo a reklama e titulo mientras Logros a purba gana pa extende e serie. Sinembargo Piratas a bin pa caba cos.
Den bom di promer inning Piratas ta bay ariba 1-0 y ta amplia cu 1 careda mas den bom di 3. Logros ta rally pa 3 careda den cabez di 4 inning pa bolter e score 3-2. Pirata mesora ta empata e wega 3-3 den bom di 4 inning. Den bom di 5 inning Piratas ta rally pa 5 careda ayuda cu algun error pa bay ariba 8-3. Logros den cabez di 7 inning ta menasa anotando 3 careda pero finalmente Piratas ta concretisa e di 3 out y ta cuminsa celebra nan titulo di campeon 2019. Boxscore final Piratas 8 careda, 11 hit, 1 error y ta laga 7 coredor na base. Logros 6 careda, 7 hit, 3 error y ta laga 3 coredor den circulacion. 
Mihor bateadornan pa Piratas ta Modesto de la Cruz 1-1, Michel Corniels 2-1, Franny D’Oleo 4-3 cu 2 rbi, Leyvis Gonzalez 3-1 cu un doblete, Whascar Perez 2-2 cu un careda anota mas 1 rbi, Ever Vivanco 3-2 cu 2 careda anota mas 1 rbi y Jeremy Moreno a bay di 3-1. Pa Logros a luci na plato den causa perdi Jurick Cecilia 2-1, Alexander Groneveld 2-1 cu un doblete, Manuel Paula 2-1, Genaro Girigorie di 3-1 kende a wordo fusila na tercera den su intento pa comberti un hit pa left den un triple. William Benitez a bay 7 inning enfrentando 30 bateador tirando 56 bola, 73 strike pa un total di 129 lansamento permitiendo 6 careda tras di 7 hit propinando 2 ponche y ta regala 5v base por bola seyando e victoria riba su nomber y e titulo maximo. William Benitez alaves a resulta e MVP. 
Edgar Bautista tambe a bay complete enfrentando 33 bateador, 34 bola, 77 strike pa un total di 111 pitch permitiendo 8 careda di cual 5 ta limpi tras di 11 hit ponchando 3 bateador y ta regala 2 base por bola pero mester conforma su mes cu e derota riba su nomber. Mester bisa cu Edgar Bautista a sali champion pitcher di campeonato cual nos lo amplia den un siguiente relato. Aruba Softball Bond ta expresa palabra di pabien na Piratas cu nan titulo di campeon y pabien na sub campeon Logros y tur cu a ricibi premionan individual. Un tremendo campeonato cu a finalisa cu un bunita wega final.
