E prome parada di carnaval 64 ta esun di Flambeu, tambe conoci na Hulandes como e “Fakkeloptocht”, den cual mas o menos 7500 carnivalista a participa. Definitivamente e parada mas grandi di carnaval. E grupo Pink4Life di e agrupacion Le Groove (Antoni Gario) a resulta esun mas grandi, tanto den participante como den siguidonan den e parada y banda di caminda.
Di acuerdo cu e lista emiti pa e organisadonan di e parada, SMAC, na momento di tira lot, tabatin 9 grupo participando den Fakkeloptocht e aña aki. Nan ta:
- Royal Carnival Group, cu e tema “3 blind mice” y cu 400 participante
- Empire Carnival Group, cu e tema “Metalic Area” cu 1000 participante
- Champagne Carnival Group, cu e tema “Dancing for a cause” cu 1400 participante
- OPC Carnival Group, cu e tema “No texting while jamming” cu 500 participante
- Los Laga Bay Carnival Group, cu e tema “Light the Torch”, cu 700 participante
- Dushi Carnival Group, cu e tema “There is no Zoo without you”, cu 650 participante
- Infinity Carnival Group, cu e tema “Snapchat this fakkel” cu 400 participante
- TOB Carnival Group, cu e tema “TOB Mimes” cu 800 participante
- Pink4Life Carnival Group, cu e tema “Shaka Zulu” cu 1000 participante
Pero, di acuerdo cu nos informacion, Pink4Life a “sold out” demasiado lihe pa cual a agrega 500 participante mas na su lista. Tambe a nota un cantidad di participante “ilegal” bailando banda di nan pero patras di e baricadanan y sin lubida e participantenan di otro grupo cu a yega final caba cu tabata bay baila e ora den Le Groove te final atrobe.
Pa hopi, a considera cu den e parada aki, Le Groove tabata e “Last Lap Band” tambe pa tur otro participante. Su formula di musica Soca riba un ritmo mas lento, sin duda ta atraendo un masa di publico cada biaha mas grandi e ultimo añanan.
Claro cu biramento grandi y crecemento ta trece retonan y complicacionnan cune, manera a sosode diasabra anochi. Un aglomeracion mucho grandi di publico cu kier baila dilanti y patras di e trailer di musica a haci masha dificil pa por a sigui e parada na e velocidad desea pa autoridad.
“Esaki ta un problema di luho, pero nos lo traha riba dje pa e siguiente paradanan”, asina un vocero di e grupo a sigura.
