Piloto y copiloto a muri: Helicopter militar a cay den lama cerca di Aruba

Awe merdia pa 2:30pm a sosode un accidente aereo, ora cu un Helicopter modelo NH90, cu ta pertenece na e stationsschip Zr.Ms. Groningen, a cay den lama na un distancia di 12,5 kilometer for di Aruba. E piloto Christine Martens di 34 aña y copiloto Erwin Warnies di 33 aña a fayece den e desgracia. E ultimo aki a bay laga atras su pareha cu un baby mucha muhe di apenas 2 aña di edad.

Na momento cu a saca nan for di e helicopter, a purba reanima nan brindando cuido medico pero lamentablemente no a logra. Tabatin dos miembro di tripulacion mas abordo, pero nan no a haya mucho sla ora e helicopter a cay den lama.

“Esaki ta un shock pisa pa tur hende”, asina Ministerio di Defensa di Hulanda a informa un rato pasa. Te na e momento aki no ta conoci ainda kico ta motibo di e accidente aki. Na e momento aki e Helicopter di Wardacosta di Caribe Hulandes y e ekipo di buceo di Marina Real di Reino Hulandes staciona na Corsou y un ekipo specialisa cu ta abordo di Zr.Ms. Groningen ta trahando hunto na e sitio di accidente, pa purba yega na e Black Box (flight recorder) como prioridad. Haya e aparato aki ta crucial pa por investiga kico ta locual a sosode abordo cu e Helicopter a cay.

Hulanda a cumpra 20 Helicopter di e modelonan aki. Nan ta midi 19,56m di largura y 5,3m di hanchura y ta pisa 11.000 kilo. Nan por bula 800 kilometer riba un velocidad maximo di 260km pa ora. Abordo nan tin 2 torpedo Mark-46 y 2 metralleur. Por biaha 3 hende como tripulacion abordo.

Ta bon pa bisa si cu biento fuerte, olanan halto, coriente pisa y scuridad di anochi no ta haciendo e trabounan di buskeda y investigacion facil. Tanten cu no tin claridad kico ta locual a sosode cu e Helicopter, Ministerio di Defensa di Reino Hulandes a dicidi di “ground” tur Helicopter modelo NH90 di defensa Hulandes. Esaki adelantando riba e decision cu Inspectie Veiligheid Defensie, IVD, probablemente lo tuma den e siguiente oranan.

Na un prome instante a bati alarma na Aruba pa trece e polito y copiloto aki pa Hospital. Lamentablemente ora cu e intentonan di reanimacion a fracasa, a cancela e vuelo pa Aruba. E ora ey a bay Corsou pa busca e “duikteam” eynan pa cuminsa buskeda di e Black Box. E dos otro coleganan a regresa riba e stationschip mes y a haya tratamento eyriba mes.