Recientemente Crioyo Boyz a lansa nan tema di mas nobo riba mercado, cual ta titula ‘Pijama’. E cancion aki ta produci pa Angelo Maduro y ta canta pa Greyssy Marcela Criales y tambe Phil Joshua Stewart Hunt.
Greyssy a conta cu e tabata den studio ora cu Angelo a bin cu e proyecto aki y ora cu el a scuch’e el a sinti cu esey ta su cantica. Nan prome produccion ta ‘Pijama’ riba e ritmo di dansadub. Nan lo tin mas cantica proximamente, di diferente genero. Nan produccion ta basa riba loke Aruba kier scucha. Ta spera cu Aruba apoya e cancion aki.
Phil Hunt tambe ta un di e cantantenan di e cancion aki. E dansadub ta un mescla entre dansa di Aruba y rubadub. E ta inspira door di Jeon y otro artistanan local cu a buta e “sample” y cada artista ta pone nan ‘saus’e n’e genero. Hunt a sigui bisa cu su vision ta pa awo keda den e genero aki y sigui traha cantica na Papiamento. Esaki no ta significa cu nan no ta baypurba [a bay afo, nan lo lansa algun cancion na Spaño. Pero cu ritmo dansa tambe ta algo pa crece localmente, crea arte na Papiamento y e arte aki hib’e afo. Y tambe pa celebr’e internamente. Aruba mester celebra loke ta di dje, su cultura. “Mi vision ta pa aporta na Aruba su cultura, cultura Rubiano y Papiamento. Esey ta mi vision tras di loke mi ta haci”, Hunt a bisa.
Hib’e afo, ta hopi bon. Pero dia cu e no t’ey mas, e kier pa su legado ta cu el a pone un zonido na Aruba su cosnan crioyo. E ta pensa cu si e no t’ey mas e dia di mañan, kico el a laga atras. E kier laga musica atras, cu e generacion siguiente sigui traha riba dje. Den futuro nan kier crea material pa e mercado internacional y e plan ta pa nan djis sigui traha. Pueblo por spera mas cantica na Papiamento, na Spaño y mescla. Nan lo bira creativo, pero semper cordando riba nan publico cual ta e publico Rubiano, cu ta e prome publico cu a apoy’e.
Crioyo Boyz ta un organisacion nobo lanta entre Angelo Maduro y Phil Hunt. nan vision ta pa traha cantica na Papiamento y tambe mescla entre Papiamentoy Spaño. Pero awo nan ta enfoca riba e club- y e emisoranan di aruba, cu e movemento di ‘dansadub’. Pa esaki nan a crea e cantica ‘Pijama’ canta door di Greysiss y Phil. e siman aki nan a bolbe drenta studio pa graba y tambe graba videoclip, e di tres den seis siman. Y tin hopi mas na caminda.
Mas aleu, Maduro a bisa cu nan ta bezig cu un label musical di Colombia pa nan crusa frontera y hiba dansadub internacional, na Medellin, Colombia, pa wak con leu por yega cu e movemento aki.
E intencion ta pa sigui y haya oportundiad pa traha cu mas artista cu a acerca nan. Nan vision ta pa logra nan metanan y tameb yuda esunnan cu nan por. Mas bien, ora cu nan ta mas aleu y tin mas tempo, nan por yuda mas.
