Diahuebs marduga pa mas of menos 2:40 am, dos hende homber lo tabata pidiendo lift den e area di Weg Fontein debi cu nan a haya problema cu nan auto. Den esaki, habitante lo a wak e dos personanan aki ta cana den e area tur na sanger.
A bin compronde cu den e proceso e dos hombernan aki lo a pidi varios auto pa lift, ofreciendo $20 pa esaki. Den esaki, un auto cu dos hende homber den dje lo a para y a bisa nan cu nan lo bay busca un primo bin bek, asina a start un pelea entre e cuater hombernan. E dosnan den e auto lo a agredi e hombernan pidiendo lift, kita tur nan pertenencia, entre otro nan telefon y nan cartera cu placa.
Polis a presenta na e sitio pa scucha declaracion di e victimanan. Tambe a notifica ambulance pa presenta y atende e dos hombernan aki. Mester a hiba un di nan IMSan pa asina ricibi tratamento medico avansa, mirando cu e tabatin un kap basta fuerte na su frenta.
