PHP: Alimentacion pa bo yiunan y pareha despues di divorcio

A pesar cu abo a divorcia bo ta keda obliga di cuida financieramente pa bo yiunan y posiblemente pa bo ex-pareha. Esaki lo nifica cu abo lo mester bai paga alimentacion. E deber di alimentacion ta conta pa parehanan casa (na Hulanda parehanan registra tambe). Nos leynan conoce dos tipo di alimentacion: alimentacion pa yiu y alimentacion pa bo ex-pareha. Remarcabel ta si cu e alimentacion pa e mucha lo tin preferencia riba esun di e ex-pareha. Ora di hasi e calculacion lo wak despues si ainda tin capacidad di carga financiero (draagkracht) pa stipula e suma di alimentacion pa e ex-pareha. 

Articulo 1:157 lid 1 BWA ta duna dos criteria pa bo por cai na remarca pa haya alimentacion di bo ex-pareha:

  1. Si abo no tin suficiente ingreso pa por mantene bo mes (y e yiunan);
  2. Y si abo no lo por haci esaki tampoco den un futuro cercano.

Por lo tanto, esaki ta un criteria dobel, es decir, tanto e homber como e muhe por haci uzo di e articulo aki pa haya alimentacion di e ex-pareha.  

Ta importante pa remarca cu alimentacion pa ex-pareha por wordo exclui door di regla esaki den un echtscheidingsconvenant. 

 

Alimentacion pa mucha

Pa por sostene e bida di un mucha mester tin suficiente placa. Den cuadro di esaki e mayor cu no ta percurando pa e mucha ta paga e mayor cu ta cuidando e mucha un suma pa alimentacion. E alimentacion ta destina como un contribucion pa e cuido y criansa di e mucha. Nos kier enfatisa cu alimentacion pa e mucha ta obligatorio! Te ora e mucha cumpli un edad di 21 aña esaki lo vence. 

 

Alimentacion pa ex-pareha 

Bo por imagina cu naturalmente e ta incomodo si acaso bo no tin suficiente entrada pa mantene bo mes. Den caso cu bo ex-pareha tin un entrada mas halto cu bo y bo no ta bibando hunto cu ningun persona tin e posibilidad pa bini na remarca pa ricibi alimentacion. E alimentacion aki ta wordo yama ‘partneralimentatie’. Mester remarca cu alimentacion di pareha ta wordo considera como un solucion temporal. E ex-pareha na un dado momento lo por bai mantene su mes. Actualmente e periodo maximo pa paga alimentacion na bo ex-pareha ta di 12 aña. 

Como ya caba a ser menciona, e periodo maximo pa paga alimentacion na bo ex-pareha ta 12 aña, pero articulo 1:157 lid 5 BWA ta duna un extension di esaki basa riba rasonabilidad y imparcialidad.

E periodo di 12 aña tin di haber cu e hecho cu si bo tin yiu cu ta bayendo scol y bo ta hayando alimentacion pa 12 aña largo, despues di e 12 aña nan aki probablemente e yiu lo ta suficientemente grandi pa e mes por haci un fiansa of busca un trabou pa por cuida di su mes. Di otro banda, e mayor por prepara su mes durante 12 aña pa drenta bek den e mercado laboral. 

Pero tin casonan den cual cu e mayor di ya caba un edad halto, ta ricibi alimentacion pa 12 aña largo y durante e 12 aña nan ey el a prepara su mes pa drenta e mercado laboral bek, pero na dado momento su edad ta asina halto cu e no lo wordo considera popular mas den e mercado laboral. E lo ta hopi dificil pa e mayor aki haya un trabou. 

Pa es motibo e articulo aki a wordo crea. Por lo tanto, e periodo di 12 aña di alimentacion lo por wordo extendi basa riba rasonabilidad y imparcialidad. 

 

Otro factornan

E periodo di alimentacion tambe por wordo determina door di otro factornan. Por ehempel bo ta hayando alimentacion y bo a dicidi pa bai biba hunto. E consecuencia di e acto aki lo pone cu e derecho cu bo tawatin pa ricibi alimentacion ta vence. Esaki ta conta tambe si na dado momento bo tin suficiente entrada.

Segun articulo 1:160 BWA e obligacion di paga alimentacion ta termina tambe na momento cu e ex- pareha cu ta hayando e alimentacion, bai biba cu un pareha nobo como si fuera nan ta casa of si nan ta casa. Ta importante pa menciona cu e articulo aki ta regelend recht, es decir, ley regula.   

 

Alimentacion pa ex-pareha den caso di un matrimonio cortico

Un matrimonio cortico ta wordo considera un matrimonio menos cu 5 aña. Articulo 1:157 lid 6 BWA ta bisa cu den caso cu tawatin un matrimonio cortico y durante e matrimonio aki ningun yiu a nace, e alimentacion cu e ex-pareha lo tin cu paga, ta igual na e periodo cu nan tabata casa. 

Por ehempel:

Boso tabata 3 aña casa y durante e matrimonio aki ningun yiu a nace. Como cu e matrimonio tabata uno cortico, abo lo tin derecho riba alimentacion di pareha solamente pa e periodo cu bo tabata casa. Den e caso aki bo lo tin derecho di haya alimentacion pa 3 aña largo.

Si boso tabata 1 aña casa y durante e matrimonio aki ningun yiu a nace bo lo tin derecho riba alimentacion di pareha pa solamente 1 aña largo.

 

Abstene di alimentacion di partner

E ta posibel pa distancia of abstene di paga alimentacion na bo ex-partner, si acaso abo cubo ex-pareha regla esaki mutuamente. Bo abogado lo por pone e afspraak aki den loke nos ta yama ‘echtscheidingconvenant’. 

Dus un ‘nihilbeding’ tambe ta posibel, esaki ta ora cu bo ta yega na un mutuo acuerdo y ta laga traha un echtscheidingsconvenant cu ta bisa por ehempel: ‘Mi no mester di alimentacion di pareha’. Esaki ta contractsvrijheid. 

 

Alimentacion y e relacion cu belasting

Ora cu abo ta ricibi alimentacion for di bo ex-pareha esaki ta wordo considera como un entrada. Esaki ta nifica cu bo lo tin cu paga belasting riba dje y esun cu ta pagando alimentacion por deduci esaki for di su aangifte inkomstenbelasting.

Tienda di Ley ta spera di por a informa ciudadanonan un poco tocante e tema di alimentacion. Nos a trata pa splica den lineanan grandi e topico aki. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm -5 pm na cas di partido AVP na playa. Pa nos colaboradornan y huristanan den formacion e ta un placer di por atende e publico cu ta asistiendo tur diasabra.